Andijon viloyati Ulug‘nor tumanida ota ikki farzandi alimenti uchun olti xonali uy berdi. Bu haqda MIB axborot xizmati xabar berdi.
Ma’lum qilinishicha, fuqarolik ishlari bo‘yicha Bo‘ston tumanlararo sudining ijro hujjatiga binoan qarzdor B.Soliyevdan undiruvchi M.Axmedova foydasiga ikki nafar farzandi ta’minoti uchun aliment to‘lashi belgilangan. Qarzdor B.Soliyev sudning hujjatiga beparvolik bilan qarab, byuro xodimlari ogohlantirishlariga qaramay, aliment pullarini to‘lamasdan kelgan. Shu sababli qarzdorga 2023-yil 15-fevralda jinoyat ishlari bo‘yicha Ulug‘nor tuman sudi tomonidan 15 sutka ma’muriy qamoq jazosi tayinlangan.
Qayd etilishicha, B.Soliyev jazo muddatini o‘tab chiqqanidan so‘ng ham tegishli xulosa chiqarmasdan, aliment pullarini bermay kelgan. Byuroning Ulug‘nor tuman bo‘limi xodimlari qarzdor otani takroriy ogohlantirib, uning ushbu harakatlari kelgusida jinoiy jazo tayinlanishiga olib borishi mumkinligini tushuntirgan.
Profilaktik suhbatlar samarasi o‘laroq, ota farzandlari 18 yoshga to‘lguniga qadar bo‘lgan aliment to‘lovlari o‘rniga 15 sotixli 6 xonadan iborat uy-joyni undiruvchi M.Axmedova nomiga rasmiylashtirib berdi.
Izoh (0)