Ichki ishlar organlarida xizmatga qabul qilishning yangi tartibi e’lon qilindi

Ichki ishlar organlarida xizmatga nomzodlardan olinadigan test sinovlari Bilim va malakalarni baholash agentligi tomonidan o‘tkazilishi belgilandi.

Xabar berilishicha, Ichki ishlar vazirligining buyrug‘i bilan Ichki ishlar organlarida xizmatga nomzodlarni tanlab olish tadbirlarini tashkil etish va o‘tkazish tartibi to‘g‘risidagi yo‘riqnoma tasdiqlandi. Prezidentning 2023-yil 20-yanvardagi PQ–10-son qarorida “Ichki ishlar organlarida lavozimlarni yuqori maʼnaviy-axloqiy, ishchanlik va kasbiy sifatlarga ega nomzodlar bilan jamlashni nazarda tutgan holda, ichki ishlar organlarida xizmatga qabul qilishning sifat jihatdan yangi, soddalashtirilgan tartibini o‘rnatish” vazifasi belgilangan. 

Ichki ishlar organlariga yoshi o‘n sakkizdan kichik va o‘ttizdan katta bo‘lmagan, shu jumladan, o‘ttiz yoshdagi ham, O‘zbekiston fuqarolari yo‘riqnomada belgilangan tanlov asosida qabul qilinadi. Yo‘riqnomaga muvofiq endilikda: 

• Nomzodlarni xizmatga tanlab olish tadbirlari quyidagi saralash va o‘rganish bosqichlarini o‘z ichiga oladi:

a) saralash bosqichi:

ro‘yxatdan o‘tish;

dastlabki o‘rganish;

intellektual rivojlanganlik darajasi va psixoemotsional barqarorligini baholash;

test sinovi;

jismoniy tayyorgarlik darajasini baholash;

b) o‘rganish bosqichi:

xizmatga yaroqlilik darajasini aniqlash maqsadida harbiy-tibbiy komissiya ko‘rigidan o‘tkazish;

psixofiziologik (poligraf) tekshiruv (ichki ishlar organlarida xizmat qilish uchun to‘sqinlik qiladigan salbiy omillarni aniqlash maqsadida).

Test sinovlari belgilangan tartib asosida (umumiy o‘rta, o‘rta maxsus va professional taʼlim fanlarining o‘quv dasturlariga muvofiq ishlab chiqiladi) Oliy taʼlim, fan va innovatsiyalar vazirligi huzuridagi Bilim va malakalarni baholash agentligi tomonidan o‘tkaziladi. Test topshiriqlari har bir fandan 30 ta topshiriqni o‘z ichiga oladi va har bir to‘g‘ri javob uchun quyidagicha ball beriladi:

• Huquqshunoslik fani bo‘yicha har bir to‘g‘ri javob uchun - 3,1 ball va jami - 93 ball;
• O‘zbekistonning eng yangi tarixi bo‘yicha har bir to‘g‘ri javob uchun - 2,1 ball va jami – 63 ball;
• tarbiya fani bo‘yicha har bir to‘g‘ri javob uchun - 1,1 ball va jami - 33 ball.

Test sinovlari natijalariga ko‘ra to‘planishi mumkin bo‘lgan umumiy 189 balldan kamida 134 ball to‘plagan nomzodlar jismoniy tayyorgarlik darajasini baholash bosqichiga o‘tgan deb hisoblanadi. Nomzodlar tomonidan bajarilishi lozim bo‘lgan jismoniy tayyorgarlik mashqlari va ularni bajarishga qo‘yiladigan talablar erkak va ayol nomzodlar uchun alohida belgilanadi. Quyidagilar erkak jinsidagi nomzodlar tomonidan bajarilishi lozim bo‘lgan jismoniy tayyorgarlik mashqlari hisoblanadi:

• kuch ishlatish mashqi – to‘sinda (turnikda) tortilish;
• tezlikka oid mashq – 100 metrga yugurish;
• chidamlilikka oid mashq – 3 000 metrga yugurish.
• Quyidagilar ayol nomzodlar tomonidan bajarilishi lozim bo‘lgan jismoniy tayyorgarlik mashqlari hisoblanadi:
• kuch ishlatish mashqi – kuch ishlatish mashqlari kompleksi;
• tezlikka oid mashq – 100 metrga yugurish;
• chidamlilikka oid mashq – 1000 metrga yugurish.

Tanlovning barcha bosqichlarida faqat “yaxshi” va “aʼlo” baho olgan nomzodlar xizmatga qabul qilinadi.