Hozirda ko‘plab ishlarni onlayn, uydan chiqmasdan bitirish mumkin. Masalan, qop ko‘tarib bozor-o‘char qilish o‘rniga onlayn do‘kondan buyurtma berishni o‘rganyapmiz. Yana masofaviy mehnat, onlayn ta’lim, ilovalar orqali to‘lov deganidek... Xuddi shu kabi yozuv-chizuvli ishlarni ham yugur-yugurlar va ovoragarchiliklarsiz bitirishning iloji bor. Biroq osh-ovqatu kiyim-kechakka internet orqali buyurtma berib o‘tirgan bugunning ayrim kishilari hujjat ishlariga kelganda idorama-idora yurish odatidan voz kecholmayati.
Albatta, turnaqator navbatlar, eshik tagida sarg‘ayishlar o‘zlariga ham yoqmaydi, hamma gap ularning bundan boshqa yo‘l yo‘q, deb o‘ylashlarida. Aslida ko‘plab davlat xizmatlarini eshikma-eshik sarson bo‘lish va qog‘ozbozliklarga ko‘milish bilan emas, Yagona portal (my.gov.uz) orqali osongina hal qilish mumkin.
Bu imkoniyatlardan foydalanish nafaqat ortiqcha vaqt, balki xarajat sarfidan ham saqlaydi. Zero, ko‘plab xizmatlarga ariza Yagona portal orqali topshirilganida chegirma qo‘llaniladi. Bundan tashqari, davlat idorasiga borib kelguncha ketadigan yo‘l xarajatlari ham iqtisod qilinadi.
Masalaning yana bir muhim tomoni bor – korrupsiyadan holilik. Ya’ni hamma ishingizni onlayn ariza topshirish orqali bitirganingizdan keyin tanish-bilish, qistir-qistirlarga o‘rin qolmaydi. Masalan, bir necha yil oldin bolasini bog‘chaga joylashtiraman, degan ota-ona mudiraning og‘zini moylashga majbur edi. Hozir esa onlayn navbatga qo‘yiladi, gali kelganda yo‘llanmani olib, bemalol maktabgacha ta’lim muassasasiga boraveradi. Maktabga joylash ham xuddi shunday. Inson omili kamaytirilib, hal qiluvchi ishlar texnikaga yuklangach, tizimda ochiqlik, shaffoflik, haqqoniylikni ta’minlash osonga ko‘chyapti, kimningdir fuqaroviy huquqlaridan foydalanish kimlarningdir tegirmoniga suv quyish evaziga amalga oshmayapti.
Onlayn xizmatlarning rivojlanishi porxo‘rlikdek taraqqiyot ildiziga bolta uruvchi illatga qarshi kurashish bilan bir qatorda firibgarlikni kasb qilib olganlarning qing‘irliklariga g‘ov bo‘lishi tabiiy. Jumladan, hujjatida muammosi bor uyni kimgadir o‘tkazib, shu yo‘l bilan pul topishga o‘rganib qolganlar bor. My.gov.uz taqdim etadigan “Bino va inshootlarning mansubligi va tarkibi to‘g‘risida ma’lumotnoma berish” xizmati sotib olinajak uy haqida barcha ma’lumotlardan voqif bo‘lish, yaxshilab tekshirib olgach, ishonch bilan xarid qilishga yo‘l ochadi.
Maqsad – xalqqa imkon qadar qulaylik tug‘dirish, odamlarni emas, hujjatlarni harakatga keltirish ekan, bunda har qanday aholi qatlami manfaatlari teng e’tiborga olinganini tilga olish joiz. Masalan, yoshga doir nafaqani Yagona interaktiv davlat xizmatlari portali orqali rasmiylashtirish mumkinligi keksa yoshdagi otaxon va onaxonlarga katta yordamdir. Axir kim ham qarigan chog‘ida bir xalta qog‘oz ko‘tarib, u yoqdan bu yoqqa sarson bo‘lishni xohlardi. Imkoniyati cheklanganlarga atalgan xizmatlar (Nogironligi bo‘lgan yoshlarga asbob-uskunalar va mehnat qurollarini xarid qilish uchun subsidiya ajratishga ariza yuborish, Nogironligi bo‘lgan yoshlarga o‘qish davrida yashash va transport xarajatlari uchun subsidiya ajratish uchun ariza yuborish, Kasanachilik yoki hunarmandchilik bilan shug‘ullanayotgan tadbirkorlik sub’yektlariga nogironligi bo‘lgan fuqarolarning ish joylarini moslashtirish uchun subsidiya, Keksalar va nogironligi bo‘lgan shaxslarga sanatoriylarda davolanish uchun yo‘llanmalar berish) ko‘pligi qatorida ularning bari bepul qilingan. Ijtimoiy himoya, kam ta’minlangan, ayollar, yoshlar, temir daftarlarida turuvchilarga atalgan xizmatlar ham xuddi shunday.
Xullas, o‘sha gap – interaktiv xizmatlar haqida odamlarning xabardorligini oshirish kerak. Shunda ular vaqt va mehnatlarini foydali narsalarga yo‘naltirgan holda raqamlashtirish zamoni nafasidan erkin nafas olishga o‘rganishadi.
Reklama huquqi asosida.
Izoh (0)