“Milliy banklararo protsessing markazi” (Humo) ustav kapitalidagi davlat ulushi to‘liq Davlat aktivlarini boshqarish agentligiga o‘tkazilishi to‘g‘risida xabar berilgandi. “Gazeta.uz”ning Davlat aktivlarini boshqarish agentligi (DABA) matbuot xizmatiga tayanib yozishicha, Humo milliy banklararo protsessing markazining DABA balansiga o‘tishi xususiylashtirish rejalari bilan bog‘liq emas.
Qayd etilishicha, 2023-yilning 9-martidan kuchga kirgan “Davlat mulkini boshqarish to‘g‘risida”gi qonunning 12-moddasiga muvofiq, davlat ishtirokidagi korxonalarga nisbatan bir vaqtning o‘zida ham mulkdorning, ham tartibga soluvchining vazifalarini bajarishga yo‘l qo‘yilmaydi. Yaʼni bu holatda Markaziy bank bank bozorini tartibga soluvchi va Humo’ning yakka egasi bo‘lib qolishi ehtimoliy manfaatlar to‘qnashuviga olib keladi.
“Ushbu holat mulkdorning vazifalarini davlat organidan Davaktiv agentligiga o‘tkazish yoki mazkur korxonani tugatish yoxud tartibga soluvchining vazifalarini ushbu davlat organidan boshqa davlat organiga o‘tkazish yo‘li bilan bartaraf etiladi”, — deya taʼkidlagan agentlik.
Endilikda qonunchilik talablarini bajarish maqsadida boshqa vazirlik va idoralar tomonidan boshqarilayotgan xo‘jalik jamiyatlarning davlat ulushlarini vakolatli organ sifatida Davaktiv agentligiga o‘tkazish ishlari olib borilmoqda.
Mazkur qonunning 22-moddasiga muvofiq, Davlat aktivlarini boshqarish agentligi davlat mulkini boshqarish sohasida vakolatli davlat organi hisoblanadi va ushbu sohada yagona davlat siyosatini amalga oshiradi.
Milliy to‘lov tizimi 2018-yil sentyabr oyida yaratilgan. O‘shanda chakana to‘lovlarni qayta ishlash bo‘yicha davlat protsessing markazining mavjud emasligi milliy to‘lov tizimining xavfsizlik darajasini pasaytirishi, to‘lov infratuzilmasining yagona integratsiyalashuviga yo‘l qo‘ymaysligi va bitta monopoliya tizimining hukmronligiga olib kelishi taʼkidlangandi. Humo o‘sha paytdagi yagona protsessing markazi — xususiy tuzilma bo‘lgan Uzcard uch kun ishlamay qolganidan keyn tuzilgan.
Izoh (0)