“Kul, baxtli bo‘l! Kim biladi, erta keladimi, yo‘qmi?”. “O‘tkinchi dunyo” hind filmi suratga olinganiga 20 yil to‘ldi (foto, video)

2003-yilda Nyu-Yorkda suratga olingan Bollivudning “O‘tkinchi dunyo” filmi millionlab muxlislar qalbidan joy olgan. Syujet​ning ta’sirchanligi, aktyorlarning mahorati va film orqali tomoshabinga yetkazilgan g‘oyaning dolzarbligi sabab oradan salkam 20 yil o‘tgan bo‘lsa ham film qayta-qayta tomosha qilinadi. E’tiboringizga film bilan bog‘liq faktlarni havola etamiz.

1. Filmdagi Priti Zinta gavdalantirgan Neyna roliga dastlab Karina Kapur taklif qilingan, lekin uning ortiqcha talablari sabab film ijodkorlari boshqa aktrisani ma’qul ko‘rgan. Shundan keyin film prodyusseri Karan Johar va Karina Kapur deyarli 1 yil gaplashmay yurgan.

2. Karan Johar Roy Orbison ijrosidagi Pretty woman qo‘shig‘ini yaxshi ko‘rganidan “O‘tkinchi dunyo” filmi uchun qo‘shiqni qayta ishlash huquqini qo‘lga kiritgan.

3. Karan Johar avvaliga filmni “Hech qachon alvido demang” deb nomlashni istagan, ammo keyinroq fikridan qaytgan. Shunga qaramay, 3 yildan keyin taqdim qilingan Shohruh Xon, Priti Zinta, Rani Mukerji va Abhishek Bachchan rol ijro qilgan boshqa bir filmni “Hech qachon alvido demang” deb nomlagan.



4. Film Karan Joharning g‘oyasi bo‘lishiga qaramay, yosh ijodkor Nikhil Advaning debyuti bo‘lgan va taniqli rejissorlarnikidan ham omadliroq chiqqan.

5. Filmning mashhur Kal ho naa ho qo‘shig‘i yaratilishi g‘oyasiga “Titanik” saundtreki, Selin Dion tomonidan ijro qilingan My heart will go on sabab bo‘lgan.



Nikhil va film kompozitori Shankar restoranda o‘tirganida ushbu qo‘shiq yangragan. Nikhil shunga o‘xshash qo‘shiq yaratilishini istashini bildirganidan keyin esa kompozitor musiqa yozishga kirishgan.

6. Shohruh Xon filmda rol ijro qilmay qolishiga bir baxya qolgan. Suratga olish jarayonining beshinchi kunida aktyor Karan Joharga telefon qilib, kasal bo‘lib qolgani sabab suratga tushishda davom etolmasligini bildirgan. Bunga javoban Nikhil Karan Johardan Shohruh Xon tuzalgunicha kutib turishni so‘ragan. Suratga olish jamoasi Bollivud qirolining butkul tuzalishini 6 oy kutgan.

7. Saif Ali Xon ijro qilgan Rohit rolini Abhishek Bachchan yoki Vivek Oberoy gavdalantirishi mumkin edi.

8. Neynaning onasi rolini Nita Kapur ijro qilishi mumkin edi, lekin rol Jaya Bachchanga nasib qilgan.

9. Film boshlanganida Neynaning yugurish sahnasi bor. Ma’lum bo‘lishicha u vaqtda Priti Zintaning jarohati borligi sabab uning o‘rniga model qiz bu epizodni ijro etgan.

10. Neynaning singlisi Jiyaning qo‘g‘irchog‘ini ushbu sahna suratga olguniga qadar Priti Zintaning o‘zi yasagan.