Қурилиш ва уй-жой коммунал хўжалиги вазирлиги “Менинг биринчи уйим” дастурини амалга ошириш чора-тадбирлари тўғрисидаги президент қарори лойиҳасини муҳокамага қўйди.
Ҳужжат лойиҳасида қайд этилишича, “Менинг биринчи уйим” дастури Қурилиш ва уй-жой коммунал хўжалиги вазирлиги томонидан Туркиянинг ТОКI давлат компанияси билан ҳамкорликда ишлаб чиқилган.
Қарор билан Тошкент вилояти ҳокимлиги ҳамда Қурилиш ва уй-жой коммунал хўжалиги вазирлигининг “Менинг биринчи уйим” дастурини биринчи босқичини тажриба-синов тариқасида Зангиота тумани “Туркистон” МФЙда амалга ошириш тўғрисидаги таклифига розилик берилмоқда.
Дастур доирасида амалга ошириладиган қурилиш ишларини мувофиқлаштириш учун Қурилиш ва уй-жой коммунал хўжалиги вазирлиги ҳузурида давлат муассасаси шаклидаги “Менинг биринчи уйим” дастурини амалга ошириш дирексияси ташкил этилади.
Белгиланишича:
- кўп квартирали уй-жойлар, йўл-транспорт, муҳандислик-коммуникация ҳамда ижтимоий инфратузилма объектларини самарали жойлаштириш, лойиҳалаштириш ҳамда қуриш ишларини ташкил этиш дирексия томонидан амалга оширилади;
- кўп квартирали уй-жойлар, йўл-транспорт, муҳандислик-коммуникация ҳамда ижтимоий инфратузилма объектларини лойиҳалаштириш ва қуриш ишларини амалга оширадиган тадбиркорлик субъектлари тендер савдолари асосида аниқланади.
- Дастур доирасида қуриладиган уй-жойлар аҳолига имтиёзли ва бозор шартларда реализация қилинади;
- имтиёзли уй-жойлар охирги 5 йил давомида мулк ҳуқуқи асосида уй-жойга эга бўлмаган оилаларга, 15 фоиз миқдорда бошланғич тўлов асосида 20 йил муддатга бўлиб-бўлиб тўлаш шартларида реализация қилинади;
- уй-жой шароитларини яхшилашга муҳтож бўлган шахсларга имтиёзли уй-жойлар бўйича бошланғич тўловининг бир қисмини қоплаш учун – қатъий белгиланган 32 миллион сўм миқдорида, ойлик тўловларининг бир қисмини қоплаш учун – беш йил давомида ҳар ойлик қатъий белгиланган 1 миллион сўм миқдорида давлат бюджети ҳисобидан субсидиялар ажратилади.
Дирексияга дастурни амалга ошириш доирасида қуйидаги ҳуқуқлар берилади:
- тадбиркорлик субъектлари билан давлат-хусусий шерикчилик битимларини тузиш ва битим шартларини мустақил белгилаш;
- “22626” махсус ҳисобварағини очиш ва ундаги маблағлардан фойдаланиш.
Қуйидагилар дастурни амалга оширишнинг молиялаштириш манбалари этиб белгиланмоқда:
- кўп квартирали уй-жойлар, йўл-транспорт ва муҳандислик-коммуникация тармоқлари, бозор инфратузилмаси объектларини лойиҳалаштириш ва қуриш, ҳудудларни ободонлаштириш ва кўкаламзорлаштириш учун – дирекция ва тадбиркорлик субъектларининг маблағлари, тижорат банкларининг кредитлари;
- ижтимоий инфратузилма объектлари (мактабгача ва умумий ўрта таълим муассасалари ҳамда тиббиёт пунктлари)ни лойиҳалаштириш ва қуриш учун — давлат бюджетидан ажратиладиган маблағлар, Тадбиркорлик инфратузилмасини ривожлантириш жамғармаси маблағлари ва қонунчилик ҳужжатларида тақиқланмаган бошқа манбалар. Бунда, ижтимоий соҳа объектлари давлат-хусусий шериклик асосида қурилганда, молиялаштириш давлат-хусусий шериклик тўғрисидаги битимга мувофиқ амалга оширилади.
Апрель ойида президент ташаббуси билан Тошкент вилоятида “Менинг биринчи уйим” дастури бошланиши тўғрисида хабар берилганди. Унга Зангиота туманидан 36 гектар ер майдони ажратилиб, ушбу ҳудудни комплекс ривожлантириш лойиҳаси ишлаб чиқилиши айтилган эди. “Ушбу ҳудудда 2,5 минг оилага мўлжалланган, барча стандартларга жавоб берувчи қулай ва энергия тежамкор 58 та кўп қаватли уй-жой барпо этилади”, — дейилган хабарда.
Изоҳ (0)