Тошкентда бундан бир ҳафта аввал иситиш мавсуми бошланганди. Ижтимоий тармоқларда шаҳардаги айрим жойларда, хусусан, Чилонзор туманидаги кўпқаватли уйларга иссиқлик қуввати етиб бормаётгани ҳақидаги хабарлар тарқалди.
Туман ҳокимлиги матбуот хизмати муносабатига кўра, куз-қиш мавсумига ҳар томонлама мукаммал тайёргарлик кўрилган ва айни вақтда бу ишлар давом эттирилмоқда. 13 октябрдан махсус ишчи гуруҳ ташкил этилган ҳолда барча кўп қаватли уйлар ва ижтимоий соҳа объектлари тўлиқ хатловдан ўтказилди. Натижада тумандаги 482 та объектларда, жумладан, 467 та кўп қаватли уйда муаммолар аниқланди ва бартараф этилди.
Бугунги кунда туманда мавжуд 1238 та кўпқаватли уйлардан 1219 тасига иссиқлик қуввати етказиб берилди. Қолган 19 та кўпқаватли уйларнинг ертўла коммуникация тармоқларида аниқланган камчиликлар бартараф этилмоқда ва тез кунларда ушбу уйларга ҳам иссиқлик қуввати тўлиқ етказиб берилади.
Иссиқлик энергиясини етказиб берувчи Veolia Energy Tashkent ахборотида маълум қилинишича, пойтахтдаги 1 852 та ижтимоий объектнинг 96 фоизида иссиқлик таъминоти ишга туширилди, 8 900 та бинодан 8 615 та турар-жой биноларида иссиқлик таъминоти йўлга қўйилди, бу умумий биноларнинг 97 фозини ташкил этади. Қолган бинолар иситиш тизимига уланиш босқичида.
Билдирилишича, агар уйда иссиқ сув таъминоти ёки иссиқлик таъминоти бўлмаса, дастлаб уй ичидаги иситиш тизимларига масъул бўлган уй бошқарувчи компанияларга мурожаат қилиш лозим. Агар иссиқлик энергиясини етказиб берувчи томонидан муаммолар аниқланса, Veolia Energy Tashkent туман бўлимларига мурожаат қилиш керак.
Изоҳ (0)