Bozorning baliq rastalarida mavsum payti ish qiziydi. Sotilgan baliqlar xaridorga shu joyning o‘zida tozalab beriladi. Har bir sotuvchining alohida baliq tozalovchi ishchisi bor. Ammo Jamshid Karimov ikkisini ham o‘zi bajaradi. Sotgan mahsulotini xaridorga tozalab ham beradi. U 25 yildan beri shu ish ortidan oilasini boqyapti.
Jamshid Karimov Yunusobod dehqon bozorida baliq tozalaydi. Bu ishni baliq sotishni boshlagan dastlabki yillarida o‘rgangan. U “Daryo” muxbiri bilan suhbatda ishining mashaqqatlari, 9-sinfdan keyin o‘qishni davom ettirolmagani, qassoblik qilgani va bolalarini o‘qitish niyati bilan yashayotgani haqida gapirib berdi.
“Ishni 1998-yilda Chinozdan o‘lgan baliq olib kelib sotishdan boshlaganmiz. Hozirgiday akvariumlar rivojlanmagan edi. U paytlarda baliqni tekin tozalab berardik. Chunki asosan mahsulotni sotsak, bo‘ldi edi. Alohida tozalovchi ishchi yo‘q edi, hammasini o‘zimiz qilardik. Bu odatga aylangan. Ish tanlab o‘tirmaymiz, sotgan balig‘imizni o‘zimiz tozalab beraveramiz. Agar men xaridor bilan savdolashayotgan bo‘lsam, sherigim ham o‘zi tozalaydi. Baʼzida bizda savdo bo‘lmay qolsa, yonimizdagi savdogarlar ham sotilgan baliqlarini berishadi. Besh ming so‘mdan tozalab beraveramiz. Muhimi — bo‘sh qolmasak bo‘ldi, bizga ish bo‘lib turgani yaxshi”, — deydi Jamshid Karimov.
Uning aytishicha, bir ishchi kuniga o‘rtacha 100-150 ta baliq tozalaydi, bu ko‘rsatkich shanba, yakshanba kunlari 200-350 tani tashkil qiladi. Maxsus uskuna yo‘q, hammasi qo‘lda bajariladi.
“Biz iloji boricha bu ishni bir kishiga topshirib qo‘ymaymiz, chunki tozalash oson emas — ayrim baliqlarning tangasi qattiq bo‘ladi, ko‘p kuch talab etadi, qo‘llar kesilib ketadi. Lekin savdo ko‘payib ketgan paytlarda tozalash bir kishiga qolib ketadi. Ayniqsa, kafe, oshxona egalari bir olishda 25-30 dona mahsulot olsa, dam olishsiz uni tozalab berguncha charchaydi odam. Xaridorlarni tez-tez jo‘natmasak, navbat kutib qolishadi.
O‘zi odatda ikki barmoq kengligida kesib beramiz, lekin ayrim xaridorlar o‘zlari qanday pishirishiga qarab o‘lchamini aytishadi. Bir yarim kilogrammlik baliqlar 2-3 ming so‘mdan, undan kattalari 4-5 ming so‘mdan tozalanadi. Chunki yirik baliqlarning tangachalari ko‘chishi qiyin. Baliqning tepa qismidagi qanotlari qattiq tishli bo‘ladi. Tirik baliq emasmi, tipirchilaydi, ehtiyotsizlik qilsak, barmoqlarimiz tilinib, kesilib qoladi”, — deydi u ishining mashaqqatlariga to‘xtalar ekan.
Yoz oxirida boshlangan baliq savdosi keyingi yil bahorning aprel oyigacha davom etadi. Baliq tozalovchilar sakkiz oylik mavsumda dam olishsiz ishlaydi.
“Orada juda muhim ishlarimiz chiqib qolmasa, har kuni bozordamiz. Keyin 4-5 oy dam olamiz, chunki apreldan avgustgacha baliqlarning ko‘payish davriga to‘g‘ri keladi, sotmaymiz. Baliqning narxi keskin oshib ketadi, kunlar ham isigach, odamlar baliq olmay qo‘yadi. Boshqa ish qilmayman, uyda mol boqaman, yozda ularga qarayman. Keyin yana baliq mavsumini boshlaymiz”, — deydi Jamshid Karimov.
Qahramonimiz ishining yoqmaydigan tomonlari haqida gapirishni istamadi. U uchun hatto baliq hidi ham noqulaylik tug‘dirmaydi.
“Yoqsa-yoqmasa — ishimiz shu, boshqa ish qilolmayman. Shuncha yildan beri baliq tozalayverib, hidi ham bilinmay ketgan, o‘rganib qolganmiz. Ishimizni tugatgach bir qo‘l-yuzimni yuvib, ko‘chaga chiqaman, do‘stlarim bilan ko‘rishaman. Birortasi ustingdan baliq hidi kelyapti, demagan shu paytgacha. Chunki biz tirik baliq sotamiz, hid o‘lgan baliqdan ko‘proq keladi. Xaridorlar bir qarashda sifatli mahsulot olishayotganiga amin bo‘lishlari uchun baliq solingan idishlarga kislorod ham ulab qo‘yganmiz”, — deydi baliq tozalovchi.
Jamshid Karimov ikki qizning otasi. U farzandlarini oliy taʼlim muassasalarida o‘qitishni niyat qiladi. Hayotidan nolimasa-da, farzandlarini o‘ziday bozorda ishlashini istamaydi.
“O‘zim 9-sinfgacha o‘qiganman. O‘rtahol oiladanmiz, katta farzandman. Ro‘zg‘orga yordam berishim kerak edi. Yoshligimda qassobchilik qilardim. Bir kun tog‘am baliqqa qarashib tur, deb yoniga chaqirgan. Shu-shu baliq savdosidaman. Nolimayman, uyimiz bor, mashinamiz bor. Yomon yashamaymiz. Lekin qizlarimni katta bo‘lsa institutlarda o‘qitmoqchiman. Menga o‘xshab bozorda yurmasdan, o‘qisa, yaxshi-da baribir. Ular oliy taʼlim olishi uchun qo‘limdan kelgancha harakat qilaman”, — deydi Jamshid Karimov.
Jamshid Karimov bu yilgi daromadidan ota-onasini umra safariga yuborishni niyat qilgan.
Maqsuda Abduqayumova suhbatlashdi
Izoh (0)