Toshkent markaziy temiryo‘l vokzalida bir bosqichli nazorat punkti foydalanishga topshirildi. Bu haqda Transport vazirligi matbuot xizmati xabar berdi.
Qayd etilishicha, bu hujjatlarni tekshirish va bagajni ko‘zdan kechirish endi avvalgidek bir nechta joyda emas, balki bir joyda amalga oshirilishini anglatadi.
Ilgari Toshkent—Janubiy, shuningdek, Samarqand va Namangan vokzallarida bir bosqichli nazorat-o‘tish punktlari joriy qilingandi.
“Kelgusida respublikamizdagi barcha temir yo‘l vokzallarida bosqichma-bosqich bir bosqichli nazorat-o‘tish punktlari joriy qilinadi”, — deyiladi xabarda.
Prezident Shavkat Mirziyoyev 2021-yil aprel oyida aeroportlar, shuningdek, temiryo‘l va avtovokzallarga kirishni soddalashtirish to‘g‘risidagi qarorni imzolagandi. Unda aerovokzal, temiryo‘l va avtobus vokzallarida yo‘lovchi hamda tashrif buyuruvchilar uchun zamonaviy talablar asosida ko‘rsatilayotgan xizmatlar sifatini tubdan yaxshilash, kirib-chiqishni soddalashtirish, zarur sharoitlar yaratish hamda vokzallar va ularga tegishli hududda tadbirkorlikni rivojlantirish ko‘zda tutilgan edi.
Izoh (0)