30-avgustdan 31-avgustga o‘tar kechasi Yer aholisi noyob astronomik hodisa — super Oyni kuzatishi mumkin. Bu haqda Boku davlat universiteti astrofizika kafedrasiga tayanib, “Report.az” xabar berdi.
Oyning Yer atrofida ellips bo‘ylab aylanishi tufayli super Oy hodisasi yuz beradi. Ma’lum bir vaqtda u Yerga eng yaqin nuqtada bo‘lib, bu perigey deb ataladi. Bu vaqtda Oy odatdagidan 14 foizga kattaroq va 30 foizga yorqinroq ko‘rinadi.
Oy 30-avgust kuni Boku vaqti bilan soat 19:52 da (Toshkent vaqti bilan 20:52) Yerga eng yaqin nuqtada bo‘lishi va 31-avgust kuni soat 05:37 da (Toshkent vaqti bilan 06:37) to‘lin oy fazasiga kirishi kutilmoqda.
Ushbu hodisalar orasidagi interval 9 soat 45 daqiqani tashkil etadi. Perigeyda Oygacha bo‘lgan masofa — 357 181 kilometr. Shunday ekan, 2023-yil 31-avgustda kuzatiladigan super Oyni yilning eng yirik super Oyi deb atash mumkin.
Izoh (0)