O‘zbekiston yoshlari Mirabror Usmonov xotirasiga bag‘ishlangan turnirda g‘olib bo‘ldi

Toshkent shahrida Mirabror Usmanov Memorial Cup—2023 xotira turniri o‘tkazildi.

Taniqli davlat arbobi, “Mehnat shuhrati”, “El-yurt hurmati” va “Do‘stlik” ordenlari sohibi, bir necha yillar davomida sport, xususan futbol rivojlanishi hamda dunyoda o‘z o‘rniga ega bo‘lishida ulkan hissa qo‘shgan shaxs — Mirabror Usmonovning yorqin xotirasida bag‘ishlangan musobaqa o‘tkazildi. 

O‘zbekiston futbol assosiasiyasi Mirabror Zufarovich xotirasiga bag‘ishlab an’anaviy xalqaro turnir tashkil etib kelmoqda. Xususan, joriy yilning 11-avgust kuni “Bunyodkor” stadionida ushbu turnirning ochilish marosimi bo‘lib o‘tdi. 11-15 avgustga qadar davom etgan turnirda 15 yoshgacha bo‘lgan 4 ta jamoa — O‘zbekiston, Saudiya Arabistoni, BAA va Chernogoriya ishtirok etdi. Uchrashuvlar “Bunyodkor”, “Paxtakor” hamda “Do‘stlik” stadionlarida bo‘lib o‘tdi.

So‘nggi turda o‘zbekistonlik yosh futbolchilar chernogoriyalik tengqurlarini yirik 6:1 hisobida mag‘lubiyatga uchratib g‘oliblikni qo‘lga kiritdi.

Musobaqadagi yorqin ishtiroklari uchun quyidagi futbolchilar taqdirlandi:

• Marko Glendza (Chernogoriya)
• Salim Esam (BAA)
• Muhammadali Musaxonov (O‘zbekiston)

Ibrohim Shokirov esa “Musobaqaning eng yaxshi darvozaboni” sovriniga loyiq ko‘rildi.

Muhammad Al-Hamid —  “Musobaqaning eng yaxshi to‘purari”.

 Jamshidbek Rustamov —  “Musobaqaning eng yaxshi futbolchisi”.