10-avgust kuni kechqurun Zaporojye shahriga raketa hujumi oqibatida bir kishi halok bo‘ldi, 16 kishi, jumladan, to‘rt nafar bola jarohatlandi. Bu haqda Zaporojye viloyati harbiy ma’muriyati rahbari Yuriy Malashko ma’lum qildi.
Unga ko‘ra, Rossiya qo‘shinlari fuqarolik infratuzilmasi obyektiga zarba bergan. Aynan qanday obyekt ekani aytilmagan, ammo binodagi yozuvga ko‘ra, bu Reikartz mehmonxonasi, deb xabar qildi BBC rus xizmati.
Zaporojyega “Iskander-K” raketalari bilan zarba berildi, deb yozmoqda “Strana.ua” nashri Ukraina politsiyasiga tayanib.
Ukraina prezidenti Vladimir Zelenskiyning so‘zlariga ko‘ra, Zaporojyega raketa hujumidan keyin yong‘in boshlangan. Zelenskiy ham hujumda Rossiya qo‘shinlarini aybladi.
Birlashgan Millatlar Tashkilotining Ukrainadagi insonparvarlik yordami koordinatori Denis Braunning aytishicha, Zaporojyedagi o‘qqa tutilgan mehmonxonadan BMT xodimlari tez-tez foydalanib kelardi.
Ukrainadagi urushni qo‘llab-quvvatlovchi rus Telegram kanallari Rossiya qo‘shinlari Zaporojyeda xorijiy yollanma askarlar va Ukraina Qurolli kuchlari harbiylari joylashgan joyga zarba bergani haqida xabar berdi.
Rossiya Mudofaa vazirligi hujumga izoh bermadi.
Rossiyaning Ukraina bilan chegaradagi viloyati o‘qqa tutildi
10-avgust kuni Rossiyaning Bryansk viloyatidagi Chausi qishlog‘i o‘qqa tutildi. Oqibatda ikki kishi halok bo‘ldi, deb xabar bermoqda viloyat gubernatori Aleksandr Bogomaz ijtimoiy tarmoqlarda.
Uning so‘zlariga ko‘ra, Chausi qishlog‘i Ukraina qo‘shinlari tomonidan o‘qqa tutilgan. Bir kishi voqea joyida vafot etgan, keyinroq ikkinchisining o‘limi haqida ma’lum bo‘lgan. Yana ikki fuqaro — bir ayol va bir erkak turli darajadagi tan jarohatlari olgan. Viloyat rahbarining aytishicha, otishma oqibatida qishloq xo‘jaligi korxonasiga zarar yetgan.
Baza nashri ma’lumotlariga ko‘ra, ferma o‘qqa tutilgan, to‘rtta artilleriya snaryadi tushgan. 50 yoshli fermer xo‘jaligi rahbari va 55 yoshli xodim jarohatlari tufayli shifoxonada vafot etgan. Telegram kanali xabariga ko‘ra, 44 yoshli fermer xo‘jaligi xodimi reanimatsiyada, 48 yoshli ishchi esa jarrohlik bo‘limida.
Bryansk viloyati, shuningdek, Ukraina bilan chegarada joylashgan Rossiyaning boshqa viloyatlari hukumati har kuni Ukraina tomonidan o‘qqa tutilayotgani haqida xabar beradi. Ukraina rasmiylari Rossiya hududiga zarba berayotganini inkor etib, ular hujum emas, mudofaa urushini olib borayotganini aytadi.
Izoh (0)