Kembrij gersoginyasi bir qator g‘ayrioddiy oziq-ovqat qoidalariga bo‘ysunadi. Ulardan ba’zilari britaniyalik jurnalistlarni juda hayratda qoldirdi, deb yozadi Marie Claire.
Buyuk Britaniyaning bo‘lajak malikasi maqomi nafaqat imtiyozlar va imkoniyatlardan iborat, balki so‘zsiz rioya qilinishi kerak bo‘lgan juda ko‘p qoida va rasmiyatchilik hamdir. Ulardan ba’zilari chindan ham hayratlanarli. Misol uchun, Kembrij gersoginyasiga kartoshka va boshqa uglevodlarni iste’mol qilish taqiqlangan.
Ratsionda kartoshkadan tashqari guruch va makaron ham bor. Sobiq qirollik oshpazi Darren MakGreydining so‘zlariga ko‘ra, bu qirollik oilasining yuqori martabali a’zolari orasidagi uzoq yillik an’anadir. Bu qirolicha Yelizaveta II ning ovqatlanish odatlari bilan bog‘liq bo‘lib, aynan u uglevodlarni iste’mol qilmagani uchun kartoshkani taqiqlashni buyurgan.
Biroq bu qoidaga faqat Britaniya qirollik oilasi a’zolari monarx bilan birga tushlik yoki kechki ovqat paytida amal qiladi. O‘z turarjoylarida har kim xohishiga ko‘ra ovqatlanishi mumkin. Ayniqsa, Keyt italyan taomlarini yaxshi ko‘radigan farzandlari shahzoda Jorj va malika Sharlotta bilan makaron pishirishni yaxshi ko‘radi.
Britaniya qirollik oilasida ovqatlanishga oid yana bir qancha qiziqarli taqiqlar mavjud. Avvalo qirollikning katta a’zolari sayohat paytida zararli mahsulotlardan qochishi kerak. Xususan, bu og‘ir oqsil zaharlanishiga olib kelishi mumkin bo‘lgan mollyuskalarga tegishli. Taqiq xom go‘shtni ham o‘z ichiga oladi, shuning uchun rasmiy tadbirlar va sayohatlarda qirollik oilasi tartar yoki karpachcho kabi taomlardan voz kechadi. Biroq istisnolar bo‘lishi ham mumkin. Kembrij gersogi sushini juda ham yaxshi ko‘radi.
Sarimsoq (va u qo‘shib tayyorlanadigan taomlar) og‘izdan kelib chiqadigan yoqimsiz hid tufayli qirollik oilasining menyusida taqiqlangan. Iste’dodli oshpaz sifatida tanilgan Kornuol gersoginyasi Avstraliyaning Master Chef shousiga tadbirlardagi menyu xususiyatlari haqida gapirib berdi. Kamillaning so‘zlariga ko‘ra, mehmonlarga tortiladigan taomlarda sarimsoq ko‘p bo‘lmasligi kerak. Ma’lumotni Darren MakGreydi ham tasdiqladi va u taqiq piyozga ham tegishli ekanini ta’kidladi.
Izoh (0)