Россия мудофаа вазири Сергей Шойгу Жанубий ҳарбий округда ўтказилган текширувда Украинадаги уруш ҳудудига қурол-яроғ етказиб беришни “алоҳида назоратда сақлаш” бўйича топшириқ берди. Бу ҳақда Россия Мудофаа вазирлиги маълум қилди.
Қайд этилишича, мудофаа вазирининг қуролли кучларнинг моддий-техник таъминотига масъул бўлган ўринбосари Кузменков Сергей Шойгуга корхоналар томонидан етказиб берилган замонавий танклар, жанговар зирҳли машиналар, махсус техникалардан иборат янги партияни намойиш этган.
Россия ҳарбий идораси раҳбари Кузменковга “махсус ҳарбий операция” ўтказилаётган ҳудудлардаги қўшинларни керакли қуролланиш ҳамда ҳарбий техникалар билан узлуксиз таъминлаш масаласини алоҳида назоратга олиш вазифасини қўйди.
5 май куни “Вагнер” ХҲК асосчиси Евгений Пригожин Шойгу ва Бош штаб бошлиғи Валерий Герасимовни ўқ-дорилар танқислиги сабабли ўз жангчилари ўлимида айблаётгани ва беҳаё сўзлар билан сўкаётгани тасвирланган видео ижтимоий тармоқларда тарқалган эди. Видео ҳалок бўлган ёлланма аскарларнинг жасадлари фонида ёзиб олинган.
Бир неча соат ўтгач, Пригожин янги видеони эълон қилиб, 10 май куни ўз жангчиларини Бахмутдан олиб чиқиб кетишини айтди, чунки “ўқ-дорилар танқис бўлган вазиятда улар маънисиз ўлимга маҳкум”.
“Вагнер” қандай гуруҳ?
Кўплаб Ғарб ОАВлари “Вагнер” гуруҳи тўғридан тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.
“Konkord” компанияси эгаси бўлган Евгений Пригожин 2016 йилдан буён АҚШ, 2020 йилдан буён эса Евроиттифоқ санкциялари остидадир. Вашингтонда у Интернет тадқиқотлари агентлиги (троллар фабрикаси) ва “Вагнер”ни назорат қилишда айбланган.
У “Вагнер”га алоқадорлигини кўп марта рад этган ва бундай айбловлар сабабли судлашган, аммо 2022 йил сентябрида у “Вагнер” асосчиси эканини маълум қилди. Ташкилотни 2014 йилда, унинг сўзларига кўра, “Донбассда рус халқига нисбатан геноцид” бошланган вақтда тузган.
Изоҳ (0)