Toshkent shahrining Sergeli va Yashnobod tumanlarida kuchli taʼsir qiluvchi dori vositalarini sotayotgan shaxslar ushlandi. Bu haqda Bosh prokuratura huzuridagi departament xabar berdi.
Qayd etilishicha, departament hamda DXXning Sergeli tumani bo‘limlari tomonidan IIB xodimlari bilan hamkorlikda tezkor tadbir o‘tkazgan. Tadbirda fuqaro Sh.R. tanishi J.A.dan xarid qilgan 12 dona “Tropikamid” nomli dori vositasini boshqa bir fuqaro Sh.H.ga 200 AQSH dollariga sotgan vaqtida ushlangan. Shuningdek, uning yonidan 1 dona “Snup” yozuvli flakon va 22 dona “Regapen” nomli kuchli taʼsir qiluvchi dori vositalari hamda fuqaro J.A.dan yana 60 dona “Regapen” nomli dori vositalari ashyoviy dalil sifatida olingan.
Shu kabi, departamentning Yashnobod tuman bo‘limi tomonidan IIBB xodimlari bilan hamkorlikda tumandagi Visol ko‘chasida o‘tkazilgan tezkor tadbirda fuqaro M.A. 238 dona “Zardeks” nomli kuchli taʼsir qiluvchi dori vositalarini o‘z xonadonida o‘tkazish maqsadida saqlab kelayotgani aniqlanib, ashyoviy dalil sifatida olingan.
Mazkur holatlar yuzasidan Jinoyat kodeksining 251-1-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijonda Qirg‘izistondan olib kelingan gashishni 1,6 ming AQSH dollariga sotmoqchi bo‘lgan 37 yoshli ayol ushlangani to‘g‘risida xabar berilgandi.
Izoh (0)