A Seriya. “Napoli” o‘z uyida “Latsio”ga yengildi va 2 oylik mag‘lubiyatsiz seriyasiga yakun yasadi

Futbol bo‘yicha Italiya A Seriyasining 25-turida “Napoli” 3-mart, juma kuni “Latsio”ni qabul qildi.

Uchrashuvning birinchi bo‘limida darvozalar daxlsiz qoldi. 67-daqiqada Matias Vesino rimliklarni oldinga olib chiqdi. Bu gol amalda o‘yin taqdirini hal qildi.

Shu tariqa Luchano Spaletti shogirdlari ikki oy deganda ilk bor mag‘lubiyatga uchradi. Oxirgi marta “Napoli” 4-yanvar kuni “Inter”ga qarshi bahsda (0:1) yengilgandi. Bu oraliqda neapolliklar 9 marta g‘alaba qozondi va bitta durang qayd etdi.

“Napoli” 65 ochko bilan musobaqa jadvalida yakka peshqadam bo‘lib turibdi. Ketma-ket uchinchi g‘alabasini nishonlagan “Latsio” esa ochkolarini 48 taga yetkazib olib, ikkinchi o‘ringa ko‘tarildi. Ushbu turdagi o‘yinlarini o‘tkazmagan Milan shahri jamoalarida 47 tadan ochko bor.

A Seriya

25-tur bahsi

3-mart, juma

“Napoli” — “Latsio” 0:1

Gol: 0:1 – 67 Vesino.

“Napoli”: Meret, Di Lorenso, Rrahmani, Kim Min Je, Olivera (Zedadka, 90), Lobotka (Ndombele, 82), Zelinski (Simeone, 82), Zambo-Angissa (Elmaz, 71), Losano (Politano, 71), Osimhen, Kvaratsxeliya.

“Latsio”: Provedel, Marushich, Gabarron, Romanyoli, Hyusay, Luis Alberto (Kataldi, 88), Vesino, Milinkovich-Savich, Felipe Anderson (Pedro, 59), Zakkanyi (Kancheleri, 82), Immobile.

Ogohlantirishlar: Gabarron (21), Osimhen (63), Elmaz (89), Marushich (90).