O‘zbekiston va Fransiya o‘rtasida hududlararo diplomatiyani rivojlantirish doirasida Yevropaning aviakosmik poytaxti — Tuluza shahrida joylashgan Fransiya Fuqarolik milliy aviatsiyasi instituti hududida buyuk astronom olim, matematik va davlat arbobi Mirzo Ulug‘bek haykali ham ochildi, deb xabar bermoqda “Dunyo” agentligi.
Tantanali tadbirda so‘zga chiqqan O‘zbekiston elchisi Sardor Rustambayev ushbu yodgorlik ikki mamlakat o‘rtasida diplomatiya munosabatlari o‘rnatilganining 31 yilligi doirasida o‘tkazilayotgani ramziy maʼnoga ega ekanini taʼkidlab, Mirzo Ulug‘bekning jahon tamadduni rivojlanishiga qo‘shgan hissasi, xususan, astronomiya sohasidagi ulkan kashfiyotlari to‘g‘risidagi fikrlarini o‘rtoqlashgan.
Fransiya Fuqarolik milliy aviatsiyasi instituti bosh direktori Olivye Shansu, o‘z navbatida, Mirzo Ulug‘bek haykali uchun O‘zbekiston hukumatiga minnatdorlik bildirgan. Uning aytishicha, ushbu yodgorlik orqali ko‘plab fransiyalik talabalar aviatsiya sohasida o‘ta muhim hisoblanadigan matematika, fizika, astronomiya kabi fanlar rivojida Mirzo Ulug‘bekning muhim o‘rni borligini bilib oladi.
Mirzo Ulug‘bek haykalini Tuluza shahrida o‘rnatish borasidagi kelishuv O‘zbekistonning Fransiyadagi elchixonasining 2020-yilda Tuluza shahri meriyasi rahbariyati bilan bo‘lib o‘tgan uchrashuvi doirasida muhokama qilingan.
Mirzo Ulug‘bekning misdan barpo etilgan haykali muallifi — samarqandlik haykaltarosh Umirzoq Sharipov. Ushbu yodgorlikning bo‘yi 240 santimetrni tashkil etadi.
Shuningdek, O‘zbekiston va Fransiya o‘rtasida diplomatiya munosabatlari o‘rnatilganining 31 yilligi tadbirlari doirasida Tuluza shahridagi botanika bog‘i hududida “O‘zbek bog‘i” tashkil etildi.
O‘zbekistonning Fransiya va Portugaliyadagi elchisi Sardor Rustamboyev o‘z nutqida Tuluza meriyasi va Samarqand viloyati hokimiyatiga ushbu loyiha amalga oshirilgani munosabati bilan minnatdorlik bildirgan. Samarqand viloyati hokimining o‘rinbosari Jamshid Xaydarov “O‘zbek bog‘i”ning tashkil etilgani o‘zaro do‘stona aloqalarni rivojlantirish yo‘lidagi saʼy-harakatlarning yaqqol samarasi ekanligini taʼkidlagan.
Tuluza shahri merining o‘rinbosari Maksim Boyyo O‘zbekiston hukumatiga “O‘zbek bog‘i”ni yaratish bo‘yicha loyihasi uchun tashakkur izhor etgan. Uning aytishicha, ushbu bog‘ Fransiyaning so‘nggi yillarda ommalashib borayotgan obodonlashtirish va ko‘kalamzorlashtirish siyosatida to‘la mos keladi. Bog‘ hududiga ekilgan O‘zbekistoning noyob ko‘chatlari o‘z mamlakati jamoatchiligida katta qiziqish uyg‘otishiga ishonch bildirgan.
Tuluza botanika bog‘i shahar markazidagi 3 gektar maydonda barpo etilgan. Unda dunyoning turli mintaqalaridan olib kelingan noyob ko‘chatlar ekilgan. “O‘zbek bog‘i” botanika bog‘ining 400 kvadrat metr maydonida yaratilgan. Bog‘ hududida O‘zbekistondan olib kelingan noyob ko‘chatlar, jumladan, Turkiston chinori, Turkiston do‘lanasi, olchasimon olxo‘ri, bodom, gilos va o‘rik ko‘chatlari ekilgan.
Eslatib o‘tamiz, 2019-yili Fransiyaning Ruey Malmezon shahrida Buxoro viloyati hokimligi ko‘magida “O‘zbek bog‘i” yaratilgan edi.
Izoh (0)