Ўзбекистон ва Франция ўртасида ҳудудлараро дипломатияни ривожлантириш доирасида Европанинг авиакосмик пойтахти — Тулуза шаҳрида жойлашган Франция Фуқаролик миллий авиацияси институти ҳудудида буюк астроном олим, математик ва давлат арбоби Мирзо Улуғбек ҳайкали ҳам очилди, деб хабар бермоқда “Дунё” агентлиги.
Тантанали тадбирда сўзга чиққан Ўзбекистон элчиси Сардор Рустамбаев ушбу ёдгорлик икки мамлакат ўртасида дипломатия муносабатлари ўрнатилганининг 31 йиллиги доирасида ўтказилаётгани рамзий маънога эга эканини таъкидлаб, Мирзо Улуғбекнинг жаҳон тамаддуни ривожланишига қўшган ҳиссаси, хусусан, астрономия соҳасидаги улкан кашфиётлари тўғрисидаги фикрларини ўртоқлашган.
Франция Фуқаролик миллий авиацияси институти бош директори Оливье Шансу, ўз навбатида, Мирзо Улуғбек ҳайкали учун Ўзбекистон ҳукуматига миннатдорлик билдирган. Унинг айтишича, ушбу ёдгорлик орқали кўплаб франциялик талабалар авиация соҳасида ўта муҳим ҳисобланадиган математика, физика, астрономия каби фанлар ривожида Мирзо Улуғбекнинг муҳим ўрни борлигини билиб олади.
Мирзо Улуғбек ҳайкалини Тулуза шаҳрида ўрнатиш борасидаги келишув Ўзбекистоннинг Франциядаги элчихонасининг 2020 йилда Тулуза шаҳри мерияси раҳбарияти билан бўлиб ўтган учрашуви доирасида муҳокама қилинган.
Мирзо Улуғбекнинг мисдан барпо этилган ҳайкали муаллифи — самарқандлик ҳайкалтарош Умирзоқ Шарипов. Ушбу ёдгорликнинг бўйи 240 сантиметрни ташкил этади.
Шунингдек, Ўзбекистон ва Франция ўртасида дипломатия муносабатлари ўрнатилганининг 31 йиллиги тадбирлари доирасида Тулуза шаҳридаги ботаника боғи ҳудудида “Ўзбек боғи” ташкил этилди.
Ўзбекистоннинг Франция ва Португалиядаги элчиси Сардор Рустамбоев ўз нутқида Тулуза мерияси ва Самарқанд вилояти ҳокимиятига ушбу лойиҳа амалга оширилгани муносабати билан миннатдорлик билдирган. Самарқанд вилояти ҳокимининг ўринбосари Жамшид Хайдаров “Ўзбек боғи”нинг ташкил этилгани ўзаро дўстона алоқаларни ривожлантириш йўлидаги саъй-ҳаракатларнинг яққол самараси эканлигини таъкидлаган.
Тулуза шаҳри мерининг ўринбосари Максим Бойё Ўзбекистон ҳукуматига “Ўзбек боғи”ни яратиш бўйича лойиҳаси учун ташаккур изҳор этган. Унинг айтишича, ушбу боғ Франциянинг сўнгги йилларда оммалашиб бораётган ободонлаштириш ва кўкаламзорлаштириш сиёсатида тўла мос келади. Боғ ҳудудига экилган Ўзбекистонинг ноёб кўчатлари ўз мамлакати жамоатчилигида катта қизиқиш уйғотишига ишонч билдирган.
Тулуза ботаника боғи шаҳар марказидаги 3 гектар майдонда барпо этилган. Унда дунёнинг турли минтақаларидан олиб келинган ноёб кўчатлар экилган. “Ўзбек боғи” ботаника боғининг 400 квадрат метр майдонида яратилган. Боғ ҳудудида Ўзбекистондан олиб келинган ноёб кўчатлар, жумладан, Туркистон чинори, Туркистон дўланаси, олчасимон олхўри, бодом, гилос ва ўрик кўчатлари экилган.
Эслатиб ўтамиз, 2019 йили Франциянинг Руэй Малмезон шаҳрида Бухоро вилояти ҳокимлиги кўмагида “Ўзбек боғи” яратилган эди.
Изоҳ (0)