Lavrov Blinkenning O‘zbekiston va Qozog‘istonga tashrifiga munosabat bildirdi (video)
Rossiya tashqi ishlar vaziri Sergey Lavrov AQSH Davlat kotibi Entoni Blinkenning Qozog‘iston va O‘zbekistonga tashrifiga munosabat bildirdi. Bu haqda “Izvestiya” xabar berdi.
Lavrovning so‘zlariga ko‘ra, AQSHning Markaziy Osiyodagi faolligini oshirishdan “maqsad” bu davlatlarning Rossiya bilan yaxshi munosabatda bo‘lishiga yo‘l qo‘ymaslikdir. Diplomat G‘arb Rossiyaga qarshi MDH makonida ishlayotganini yashirmasligini aytdi. U MDH davlatlarida nafaqat amerikaliklar, balki yevropaliklar va inglizlar ham faollik ko‘rsatayotganini bildirdi. Lavrov ularning barchasi Rossiyaning ittifoqchi davlatlar bilan hamkorligiga “salbiy ta’sir” ko‘rsatishni xohlashini aytdi.
“Ular bu mamlakatlarning Rossiya bilan yaxshi munosabatlarini saqlab qolishiga yo‘l qo‘ymaslik uchun shunday faollik ko‘rsatmoqda” — dedi u.
Rossiya tashqi ishlar vaziri G‘arb MDH davlatlarini o‘z pozitsiyasini oldindan hal qilishga chaqirayotganini qo‘shimcha qildi.
AQSH Davlat kotibi Entoni Blinken va Rossiya tashqi ishlar vaziri Sergey Lavrov 2-mart kuni Nyu-Dehlidagi G20 tashqi ishlar vazirlari sammiti doirasida urush boshlanganidan beri ilk yuzma-yuz uchrashdi. AQSH Davlat departamentining ismini oshkor etmagan vakilining CNN telekanaliga aytishicha, uchrashuv rejalashtirilmagan va taxminan o‘n daqiqa davom etgan. Blinken uchrashuv o‘tkazishni taklif qilgan. Rossiya Tashqi ishlar vazirligi rasmiy vakili Mariya Zaxarova buni tasdiqladi.
AQSH Davlat kotibi Entoni Blinken Markaziy Osiyo davlatlari bo‘ylab safarini Qozog‘istonga tashrif bilan boshladi. U yerda respublika rahbari Qosim-Jo‘mart To‘qayev bilan uchrashuvda xavfsizlik masalalari hamda Vashington bilan diplomatik munosabatlarni muhokama qildi. Siyosatchi hamkasbi bilan muloqotda bir necha bor Rossiyani tajovuzkorlikda ayblash imkoniyatini boy bermadi.
