O‘zbekistonda eng ko‘p chakana savdo qaysi hududlarda amalga oshirilgani ma’lum qilindi

Davlat statistika qo‘mitasi 2022-yil yanvar—dekabr oylari bo‘yicha chakana savdo aylanmasini e’lon qildi.

Mamlakat bo‘yicha chakana savdo aylanmasi 319,2 trln so‘mni tashkil etdi. Bu 2021-yilning yanvar—dekabr oylariga nisbatan 12,3 foizga ko‘p.

Chakana savdo aylanmasining tarkibiy qismlari 79,4 foiz kichik biznes va xususiy tadbirkorlik subyektlari, 20,6 foiz yirik korxonalar va 8,1 foizi uyushmagan savdo hissasiga to‘g‘ri keldi.

2021-yilning yanvar—dekabr oylariga nisbatan Toshkent shahri (14,6 foiz), Namangan (14,2 foiz), Surxondaryo (13 foiz), Xorazm (12,6 foiz) viloyatlarida chakana savdo tovar aylanmasining ko‘payish sur’atlari kuzatilib, eng yuqori ko‘rsatkich Toshkent shahrida qayd etildi.

So‘nggi 6 yillikda chakana savdo tovar aylanmasining yuqori o‘sish sur’ati 2022-yilda kuzatildi. Bunda chakana savdo tovar aylanmasi o‘tgan yilning mos davriga nisbatan 12,3 foizni yoki 319,2 trln so‘mni tashkil qildi.

Tovar aylanmasida eng yuqori ulush Toshkent shahrida — 25,7 foiz ya’ni 81,9 trln so‘m bo‘lgan.

Mamlakat chakana savdo tovar aylanmasida eng quyi ulushni Sirdaryo viloyati 1,5 foiz bilan 4,9 trln so‘mni tashkil etdi.

Yirik korxonalarning tovar aylanmasi hajmi 2021-yilning yanvar—dekabr oylariga nisbatan 330,7 foizga o‘sdi. Bu 65,7 trln so‘mga teng. Bu esa umumiy savdo hajmining 20,6 foiz ulushiga to‘g‘ri keldi.

Kichik biznes va xususiy tadbirkorlik subyektlari chakana savdo tovar aylanmasi hajmi 253,5 trln so‘mni tashkil etib, 2021-yilning yanvar—dekabr oylariga nisbatan 8,4 foizga ko‘paydi. Davlat miqyosida ushbu sektorning jami ulushi 79,4 foizni tashkil etdi.

Kichik biznes va xususiy tadbirkorlik subyektlari ulushi bo‘yicha Sirdaryo (94 foiz), Namangan (92,3 foiz) va Surxondaryo (92,1 foiz) viloyatlari yetakchilik qilmoqda.

Yirik korxonalarning ulushi 20,6 foizni tashkil etib, eng katta ulush Toshkent shahrida (39,2 foiz), Toshkent (23,9 foiz) va Samarqand (19,9 foiz) viloyatlarida kuzatildi.

2022-yilning yanvar—dekabr oylari holatiga ko‘ra, o‘rtacha aholi jon boshiga chakana savdo tovar aylanmasi 8,9 mln so‘mni tashkil etdi. Bu ko‘rsatkich 2021-yilning mos davriga nisbatan 10 foizga oshgan.