Rekord darajadagi summa: Uels malikasi Keyt Middlton 2022-yilda garderobiga qancha pul sarfladi?

Bo‘lajak qirolicha — shahzoda Uilyamning rafiqasi Ketrin jahon sahnasida Britaniya monarxiyasini namoyon etadi, shuning uchun uning garderobi mukammal bo‘lishi kerak. Liboslarga tejamkorlik bilan yondashish va ommaviy bozorga bo‘lgan muhabbatga qaramay, 2022-yil Uels malikasining garderobi jiddiy xarajatlarni talab qildi, deb yozadi “Noviy ochag”.

Uels malikasi har doim juda zamonaviy va did bilan kiyinadi, ammo 2022-yil uning qiyofasi butunlay o‘zgardi. Gap shundaki, uning garderobi uchun sarflangan xarajat keskin oshdi, chunki koronavirus pandemiyasi tugagandan so‘ng Ketrin va shahzoda Uilyam muntazam qirollik tadbirlariga va xorijiy safarlarga chiqdi.

Daily Mail nashri tomonidan taqdim etilgan ma’lumotlarga ko‘ra, Keyt Middlton 2022-yil davomida umumiy 211 500 dollar (176 664 funt sterling)ga yangi kiyimlar sotib olgan. Bu uning 2017-yildagi rekordini yangiladi, o‘sha yili uning garderobi uchun 142 500 dollar (119 ming funt sterling) sarflangan.

O‘tgan yillarga kelsak, 2021-yilda Keyt libos va aksessuarlarga 57 000 dollar (47 595 funt sterling), 2020-yilda 112 500 dollar (94 ming funt sterling), 2019-yilda esa 123 300 dollar (103 ming funt sterling ) sarflagan.

Malikaning 2022-yildagi eng qimmat obrazi uning “Top Gan: Meverik” filmining premyerasida 3 200 dollar (2 700 funt sterling)ga baholangan Roland Mouret brendiga tegishli qora libosda chiqishi bo‘ldi. Keyt tashqi ko‘rinishini Alexander McQueen brendidan 420 dollar (1 350 funt sterling)lik qora billur klatch,  Prada’dan 420 dollar (350 funt sterling)ga teng  qora zamsh tufli va Robinson Pelham’ning 12 600 dollar (10 560 funt sterling)lik oq oltin va olmosli ziraklar bilan boyitdi.

Qolaversa, Keyt Middlton 2022-yil juda ko‘p qimmatbaho zargarlik buyumlaridan ham foydalangan, ammo ularning aksariyati marhum qirolichadan qolganligi sababli u yangi buyumlar ro‘yxatiga kiritilmagan.

Shuningdek, shahzoda Uilyam va Keyt Middltonning Karib dengizi bo‘ylab sakkiz kunlik gastrol safari chog‘ida malikaning eng qimmat kiyimlari, jumladan, Jenny Packham’ning 4 800 dollar (4 084 funt sterling)lik zumrad rangli libosi ham ko‘zga tashlandi.

Keyt o‘zining Karib dengizi bo‘ylab sayohatini zamonaviy Zolushka ko‘rinishidagi ajoyib obrazi bilan yakunladi. Malika britaniyalik dizayner Phillipa Lepleyning taxminan 7 200 dollar (6000 funt sterling) turadigan havorang atlas ko‘ylagini kiydi. Middlton sehrli obrazni klassik bejirim aksessuarlar bilan to‘ldirdi: bir juft Van Cleef & Arpels sariq oltin va marvarid ziraklar va 2020-yilda BAFTA taqdirlash marosimida ham foydalangan 270 dollar (225 funt sterling)lik Lulu Guinness brendiga tegishli klatch.

Ketrin shuningdek, Swarovski kristallari bilan bezatilgan Gianvito Rossi brendi tuflilarini ham kiygan. “Zolushka uchun mukammal tufli” nomini olgan oyoq kiyimlarning narxi 1 400 dollar (1225 funt sterling)ni tashkil qiladi.

Keyt kiygan hashamatli brendlari orasida Alexander McQueen, Catherine Walker, Emilia Wickstead va Alessandra Rich eng sevimlilaridir. U odatda Gianvito Rossi, Jimmy Choo va Emmy London kabi brendlarga tegishli tuflilardan kiyadi.

Darhaqiqat, 2022-yilgi katta xarajatlarga qaramay, Ketrin o‘zining avvalgi sevimli kiyimlarini ham kiyishda davom etmoqda, shuningdek, Zara, Hobbs va Mango kabi brendlarga ham murojaat qilgan.