Qashqadaryoda yo‘ldan o‘tayotgan to‘rt kishi Nexia-2 urib yuborishi oqibatida vafot etdi

Qashqadaryoning Yakkabog‘ tumanida Nexia-2 haydovchisi 4 kishini urib yuborib, ularning o‘limiga sababchi bo‘ldi.

Viloyat IIB matbuot xizmatining ma’lum qilishicha, voqea 3-yanvar kuni taxminan soat 18:20 lar atrofida Yakkabog‘ tumani “Mevazor” MFY hududida yuz bergan. Haydovchi R.A. Nexia-2 ni Shahrisabz tumanidan Yakkabog‘ tumani yo‘nalishi tomon boshqarib borayotganida yo‘lni kesib o‘tayotgan J.X., M.M. hamda voyaga yetmagan Sh.S., Sh.X.ni urib yuborgan.

Oqibatda ularning uch nafari olgan tan jarohati tufayli voqea joyida, yana biri shifoxonada vafot etgan.

Mazkur holat yuzasidan Yakkabog‘ tuman IIB TB tomonidan R.A.ga nisbatan Jinoyat kodeksining 266-moddasi 3-qismi “a” bandiga asosan (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) jinoyat ishi qo‘zg‘atilgan.

Haydovchi R.A. Jinoyat protsessual kodeksining 221-moddasi tartibida ushlanib, unga nisbatan qamoqqa olish ehtiyot chorasi qo‘llanilgan.