“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 12-soni mavzusi “Jamoat transporti muammolari” bo‘lib, dastur mehmoni sifatida iqtisodchi Otabek Bakirov taklif etildi.
Transport vaziri Ilhom Mahkamov, bosh vazir o‘rinbosari Ochilboy Ramatovlar muammoli manzillarga bir borib ko‘rsin. Qo‘l boshqaruvi ham kerak, professionallar toki muammoni anglab yechim topgunicha, rahbarlar tezroq hal qiladi, ishlar tezroq bitadi. Chunki ularning qo‘lida o‘n minglab ijrochi va resurslar bor. Bu davomiy bo‘lishi uchun esa tizimlashtirish va moliyalashtirish kerak.Biz hozir davlat rahbari topshirig‘i bilan mudofaa vazirligi, ichki ishlar vazirligi, milliy gvardiya resurslaridan foydalanyapmiz, tugab qolsa nima qilamiz? Yangi yilgacha bir hafta qoldi, hali shaharning budjeti, budjet loyihasi, tasdig‘i ham yo‘q. Shaharni qo‘ya turaylik, respublika budjeti mavjud emas haligacha. Avvaldan bo‘lgan 975 ta yoki 1050 ta, prezident kelasi yilga va’da qilgan qo‘shimcha yana 1000 ta avtobusga yetarli darajada moliyaviy resurslar borligiga ishonchimiz komilmi? Shahar xarajatlarini o‘z hisobidan qilishi, budjetda jamoat transport xarajatlari ham aks etishi kerak.
Keyingi masala — shaharning transport tizimini barqaror moliyalashtirish. Prezident avtobus haydovchilarining oyligini oshirib berdi, yaxshi, lekin xarajat faqat oylik maoshdan iborat emas. Yoqilg‘i, yuvish, saqlash, yangilash xarajatlari ham bor. Bu masalalar barqaror bo‘lishi kerak, — deydi Bakirov.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)