AQSHning Meksika bilan chegaradosh shahrida muhojirlar oqimi sabab favqulodda holat e’lon qilindi

AQSHning Meksika bilan chegaradagi El-Paso shahri meri yuzlab muhojirlar sovuq havoda ko‘chalarda uxlayotgani va har kuni minglab odamlar qo‘lga olinayotganini aytib, 17-dekabr kuni favqulodda holat e’lon qildi. Bu haqda The Texas Tribune xabar bermoqda.

Mer va demokrat Oskar Lizerning aytishicha, favqulodda holat e’lon munosabati bilan shahar rasmiylari Meksika chegarasini kesib o‘tgan muhojirlarga boshpana va zarur resurslar berish imkoniyatiga ega bo‘ladi. “Biz odamlarga hurmat bilan munosabat ko‘rsatilishiga ishonch hosil qilishni istadik. Hamma xavfsiz ekaniga ishonch hosil qilishni xohlaymiz”, — dedi Lizer jurnalistlarga.

Shaharda favqulodda holat rejimi koronavirus pandemiyasi davrida chiqarilgan 42-sonli farmonga muvofiq joriy etilgan. Favqulodda holat El-Paso hukumatiga muhojirlar oqimini cheklash va ularni tunash joylari bilan ta’minlash uchun qo‘shimcha mexanizmlarni ishga tushirish imkonini beradi. Xususan, favqulodda holat shaharga davlat budjetidan qo‘shimcha mablag‘ olishga ruxsat beradi.

Ob-havo ma’lumotlariga ko‘ra, El-Paso joylashgan Texas janubiga yaqin haftalarda tungi ayoz kelishni boshlaydi. Favqulodda holat 24-dekabrgacha amal qiladi va agar kerak bo‘lsa, yana uzaytiriladi.

Qo‘shma Shtatlar muntazam ravishda Meksikadan keluvchi muhojirlar oqimiga duch keladi. 2018-yilda prezident Donald Tramp davrida ikki davlat chegarasida devor qurishga qaror qilingandi. Keyinroq Arizona shtatining respublikachi gubernatori Dug Dyusi Jo Bayden hokimiyatga kelganida milliardlab dollarlik ish nihoyasiga yetmay qolganini va devorning chala qismi muhojirlarning AQSHga noqonuniy o‘tishini osonlashtirayotganini aytgan.