Bugun,

  • USD 11095.31
  • RUB 173.84
  • EUR 10772.44

Senat raisi Tanzila Norboyevaga o‘zganing xonadoniga o‘g‘rilikka tushgani va 12,5 ming dollar mablag‘ni o‘g‘irlashda gumonlanayotgani aytilgan ayol IIB xodimlari unga kuch ishlatib, aybni bo‘yniga qo‘yganini aytmoqda. Bu haqda ayol Toshkent shahar prokuroriga yozilgani aytilgan shikoyat arizasida ma’lum qilgan.

Foto: “Daryo”

Foto: “Daryo”

Dastlabki ma’lumotlarga ko‘ra, 37 yoshli gumonlanuvchi D.T. Mirzo Ulug‘bek tumanida joylashgan, maxsus qo‘riqlovga olingan Do‘rmon kompleksidagi 22-uyda enaga sifatida ishlab kelgan bo‘lib, 2-noyabrdan 6-noyabrgacha bo‘lgan navbatchilik vaqtida uydagi javon ichidan uy bekasiga tegishli 12,5 ming dollarni yashirin ravishda talon-toroj qilganlikda gumon qilingan. Va 2022-yil 26-noyabr kuni gumonlanuvchi sifatida jinoyat ishiga jalb etilgan. Gumonlanuvchiga 2022-yilning 2-dekabr kuni Mirzo Ulug‘bek tumani prokurori iltimosnomasi bilan Jinoyat ishlari bo‘yicha Mirzo Ulug‘bek tumani sudi ajrimiga muvofiq qamoqqa olish ehtiyot chorasi qo‘llanilgan.

Inson huquqlari “Ezgulik” jamiyati raisi Abdurahmon Tashanov tomonidan “Daryo”ga taqdim qilingan hujjatlarda yozilishicha, gumonlanuvchi ayol 2022-yilning 7-dekabr kuni soat 15:50 da huquqni muhofaza qiluvchi organ, manbalarning ma’lumot berishicha Toshkent shahar prokuroriga ariza yozib, 2022-yil 2-dekabrdan gumonlanuvchi sifatida Toshkent shahar IIBBning vaqtincha saqlash xonasida ushlab turilganini, 5-dekabr kuni soat 6:00 larda esa Dilmurod ismli tergovchi hamrohligida vaqtincha saqlash binosining to‘rtinchi qavatiga olib chiqilib, aybini bo‘yniga olishi uchun qiynoqqa solinganini ma’lum qilgan.

Foto: “Daryo”

Foto: “Daryo”
2022-yil 5-dekabr kuni soat 6:00 larda meni Dilmurod tergovchi xonasiga olib bordi. U yerda Mirzo Ulug‘bek tuman IIB Jinoyat qidiruv bo‘limi xodimi Bekzod kelib, Dilmurodni tergov bo‘limi xodimi deb aytdi. Dilmurodning xonasi to‘rtinchi qavatga olib chiqdi. U yerda menga avval yaxshi gapirishdi, keyin Bekzod menga baqirdi va chap oyog‘imni oyog‘i bilan bosdi. Keyin menga jismoniy mashqlar qildirdi va jismoniy zarar yetkazdi. Yelkamga, qo‘limga musht qilib urdi. Keyin menga hozir kiyimingni yech, rasmga olib eringga jo‘nataman, deb majburladi. Men ulardan bu ishni qilmasligini so‘radim.

Hozirda kasal ekanimni aytdim. Keyin ular buni inobatga olib, o‘tqazishdi va qo‘limga qog‘oz tutqazishdi. Ular menga o‘g‘rilikni bo‘yningga ol, 100 dollar olgan bo‘lsang ham yoz deyishdi. Ular shunday qilsam, meni chiqarib yuborishlarini aytishdi. Men esa pul olmaganimni aytdim. Ular shundan keyin sen bilan ertaga gaplashamiz, deyishdi, — deyiladi gumonlanuvchi ayolning Toshkent shahar prokuraturasiga yozilgani aytilgan arizasida.

“Daryo” gumonlanuvchi ayol tomonidan yozilgan shikoyat xatidagi “Bosim o‘tkazib, qiynoqqa solayotgan ushbu xodimlarga nisbatan tekshiruv o‘tkazib, qonuniy chora ko‘rishingizni so‘rayman”, degan jumlalarga qanday javob bo‘lganini bilish maqsadida Bosh prokuratura axborot xizmati bilan bog‘lanib, ariza haqiqatan ham Toshkent shahar prokuroriga yozilganiga aniqlik kiritishga urindi.

Bosh prokuratura axborot xizmati rahbari Hayot Shamsutdinov “Daryo”ning bu haqdagi so‘roviga javoban mazkur arizaga aniqlik kiritishini va bu haqda batafsil axborot berishini bildirdi.

Daryo” gumonlanuvchi ayol bilan ham suhbatlashishga urindi. Ayolning shaxsiy telefoniga javob bergan uning yaqini hozirda hech qanday muammo yo‘qligini, barchasi iziga tushganini bildirdi.

Nashrning boshqa manbasiga ko‘ra, 12,5 ming dollaridan ayrilgani aytilayotgan jabrlanuvchi ariza bergan kunining ertasiga yana huquqni muhofaza qiluvchi organga murojaat qilib, da’vosi yo‘qligini bildirib, arizasini qaytarib olgan. Hamda 12,5 ming dollardan voz kechgan. Gumonlanuvchi o‘sha kunning o‘zida qo‘yib yuborilgan.
Bu voqea ijtimoiy tarmoqlarda tarqalishidan ancha oldin yakunlangan edi, — deydi “Daryo”ning Senat raisiga yaqin manbalaridan biri.
“Daryo” voqealar rivojini kuzatishda davom etadi.

Izoh
Asosiy yangiliklar
Mahalliy
1000 dollar oylik olayotgan oʻqituvchilar, 1 mln nafardan oshgan talabalar, yangi qurilgan 27 ta TTJ — oliy taʼlim vaziri oʻrinbosari Komiljon Karimov bilan ekskly...
Mahalliy
Saudiyalik tadbirkor O‘zbekistonda avtomashina ehtiyot qismlari ishlab chiqarishga sarmoya kiritadi 
Dunyo
O‘zbekistonda qidiruvda bo‘lgan Xitoy fuqarosi Qirg‘izistonda qo‘lga olindi