Rossiya qo‘shinlari Zaporojye viloyatining bosib olingan qismidan olib ketilmoqda — Ukraina qurolli kuchlari
Rossiya qo‘shinlari o‘zining alohida bo‘linmalarini Ukrainaning Zaporojye viloyatida bosib olingan hududlardagi ba’zi aholi punktlaridan olib ketmoqda. Bu haqda Ukraina qurolli kuchlari Bosh shtabi 1-dekabr kuni kechqurun e’lon qilgan ma’lumotda aytiladi.
Rossiyalik harbiylar, shuningdek, hudud bosib olinganidan keyin tayinlangan mahalliy ma’muriyatlar xodimlarini ham evakuatsiya qilishga tayyorlanmoqda, deya da’vo qiladi Ukraina Bosh shtabi.
Chunonchi, ma’lumotda aytilishicha, Mixaylovka qishlog‘idan (Melitopoldan taxminan 60 km uzoqlikda joylashgan) mahalliy politsiya bo‘limlari va o‘quv muassasasiga joylashib olgan bo‘linmalar chiqib ketgan.
Pologi shahrida va Injenernoye qishlog‘ida Rossiya harbiylari o‘zlari qarorgoh sifatida foydalanib kelgan uylarni tark etmoqda va o‘zlari bilan “o‘g‘irlangan mol-mulk”ni olib ketmoqda, deyiladi xabarda. Burchak qishlog‘ida Rossiya tomonidan tayinlangan hukumat “aholini ixtiyoriy ravishda evakuatsiya qilish” uchun ro‘yxat tuzmoqda.
Rossiya Mudofaa vazirligi va Zaporojye viloyatining bosib olingan hududi ma’murlari Ukraina qurolli kuchlari Bosh shtabi ma’lumoti yuzasidan izoh berganicha yo‘q.
Avvalroq Rossiya va Ukraina qo‘shinlari qishki kampaniyaga tayyorlanayotgani xabar berilgandi. Ukraina armiyasi Rossiya qo‘shinlarini Qrim bo‘yinlaridan uzib qo‘yish yoki ularni Qrimga siqib chiqarish uchun Zaporojye viloyatiga bostirib kirishni amalga oshirishga urinib ko‘rishi taxmin qilinmoqda. Ushbu hududdagi Rossiya qo‘shinlari guruhlari ta’minotining deyarli barchasi yarim orol orqali keladi.
Mavzuga doir:
- Zaporojye viloyatidagi shifoxonaning o‘qqa tutilishi oqibatida chaqaloq halok bo‘ldi (video)
- “Bunga hech qanday sabab yo‘q”. Anneksiya qilingan Zaporojye viloyatidan aholini evakuatsiya qilish haqidagi mish-mishlar rad etildi
