Россия қўшинлари ўзининг алоҳида бўлинмаларини Украинанинг Запорожье вилоятида босиб олинган ҳудудлардаги баъзи аҳоли пунктларидан олиб кетмоқда. Бу ҳақда Украина қуролли кучлари Бош штаби 1 декабрь куни кечқурун эълон қилган маълумотда айтилади.
Россиялик ҳарбийлар, шунингдек, ҳудуд босиб олинганидан кейин тайинланган маҳаллий маъмуриятлар ходимларини ҳам эвакуация қилишга тайёрланмоқда, дея даъво қилади Украина Бош штаби.
Чунончи, маълумотда айтилишича, Михайловка қишлоғидан (Мелитополдан тахминан 60 км узоқликда жойлашган) маҳаллий полиция бўлимлари ва ўқув муассасасига жойлашиб олган бўлинмалар чиқиб кетган.
Пологи шаҳрида ва Инженерное қишлоғида Россия ҳарбийлари ўзлари қароргоҳ сифатида фойдаланиб келган уйларни тарк этмоқда ва ўзлари билан «ўғирланган мол-мулк»ни олиб кетмоқда, дейилади хабарда. Бурчак қишлоғида Россия томонидан тайинланган ҳукумат «аҳолини ихтиёрий равишда эвакуация қилиш» учун рўйхат тузмоқда.
Россия Мудофаа вазирлиги ва Запорожье вилоятининг босиб олинган ҳудуди маъмурлари Украина қуролли кучлари Бош штаби маълумоти юзасидан изоҳ берганича йўқ.
Аввалроқ Россия ва Украина қўшинлари қишки кампанияга тайёрланаётгани хабар берилганди. Украина армияси Россия қўшинларини Қрим бўйинларидан узиб қўйиш ёки уларни Қримга сиқиб чиқариш учун Запорожье вилоятига бостириб киришни амалга оширишга уриниб кўриши тахмин қилинмоқда. Ушбу ҳудуддаги Россия қўшинлари гуруҳлари таъминотининг деярли барчаси ярим орол орқали келади.
Мавзуга доир:
Изоҳ (0)