Hindistonda milliarder Gautam Adanining yangi loyihasiga qarshi ommaviy namoyishlar avj oldi

Hindiston janubidagi Kerala shtatida namoyishchilar bilan bo‘lib o‘tgan to‘qnashuvda kamida 36 nafar politsiyachi jarohatlandi, deb xabar bermoqda Reuters.

Vijinjama tumanida Adani Group kompaniyasi tomonidan port qurilishiga qarshi chiqqan fuqarolar politsiya tomonidan hibsga olina boshlagach, ziddiyat yuzaga keldi. Qariyb 900 million dollarlik port loyihasi Hindiston hukumati tomonidan 2015-yildayoq ma’qullangan. Biroq milliarder Gautam Adanining kompaniyasi haligacha qurilishga kirisha olgani yo‘q.

Kompaniya dastlab yerni sotib olish masalalarini hal qildi, so‘ng qurilish COVID-19 pandemiyasi tufayli kechiktirildi. Kompaniya loyihani amalga oshirishga joriy yilda kirishishga umid qilgandi, biroq avgustdan buyon qurilish maydonini mahalliy aholi, asosan baliqchilar jamiyati vakillari to‘sib qo‘ymoqda. Ular Vijinjamada yirik port qurilishi natijasida qirg‘oq jinslari eroziyasi kuchayib, baliqchilar tirikchilik vositalaridan ayriladi, deb hisoblamoqda.

Sud port qurilishi qonuniy ekani haqida qaror chiqardi, shundan keyin o‘tgan dam olish kunlari texnika yana bir bor obyektga kirishga urinib ko‘rdi. Namoyishchilar yana yo‘lni to‘sib qo‘ydi, so‘ng voqea joyiga politsiya otryadlari yetib kelib, ommaviy hibsga olinishlar boshlandi.

Bundan norozi bo‘lgan yuzlab namoyishchilar politsiya uchastkasiga borib, o‘z maslakdoshlarining ozod etilishini talab qildi. Politsiya ma’lum qilishicha, namoyishchilar “qurol bilan kelib, uchastkaga bostirib kirgan va politsiyachilarni garovga olib, qo‘lga olinganlar ozod etilmasa, uchastkaga o‘t qo‘yish bilan tahdid qilgan”.

Adani Group voqea yuzasidan izoh berganicha yo‘q.

Osiyoning eng boy odami

Shu yil fevralida kichik biznes tijoratini ko‘p tarmoqli portlar, shaxtalar va “yashil” energiya biznesiga aylantirgan hindistonlik milliarder Gautam Adani Osiyoning eng boy odamiga aylangan edi.

Sentabrda esa u Jeff Bezosni ortda qoldirib, dunyoning ikkinchi eng boy odamiga aylandi. Yilni Bloomberg milliarderlar indeksida 14-o‘rindan boshlagan Adanining boyligi 146,9 milliard dollarga yetdi, bu Ilon Maskning 260 milliard dollaridan keyingi eng ko‘p boylik.

60 yoshli Adani 1980-yillarning boshida Mumbayning olmos sanoatida omadini sinab ko‘rish uchun kollejni tashlab ketgan.

O‘shandan beri uning konglomerati aeroportlardan tortib ma’lumot markazlari, sement, ommaviy axborot vositalari va yashil energiyagacha kengayib, bosh vazir Narendra Modi Hindistonning uzoq muddatli iqtisodiy maqsadlariga erishish uchun muhim deb hisoblagan sohalarga e’tibor qaratdi.

Mamlakatdagi eng yirik xususiy sektor porti va aeroport operatorlari, shahar-gaz distribyutorlari va ko‘mir ishlab chiqaruvchisi Adani imperiyasining bir qismi bo‘lib, u ham dunyodagi eng yirik qayta tiklanadigan energiya ishlab chiqaruvchisi bo‘lishni maqsad qilgan.