Boeing kompaniyasi Pentagonga Ukraina uchun bazasi yer ustida bo‘lgan yuqori aniqlikdagi kichik gabaritli arzon bombalar (GLSDB) ishlab chiqarishni taklif qildi. Bu haqda Reuters tegishli maxfiy hujjatlarga tayanib xabar berdi.
GLSDB snaryadi M26 raketa dvigateli va GBU-39 kichik diametrli bombasidan iborat. O‘q-dorining narxi bor-yo‘g‘i 40 ming dollarga teng, M26 dvigateli esa keng tarqalgan, natijada snaryadni ishlab chiqarish arzon va oson bo‘ladi.
GLSDB parvoz masofasi taxminan 150 kilometrga teng — Reuters qayd etishicha, bu Ukrainaga Rossiyaning frontdan ancha ichkari hududlaridagi nishonlarga zarba berish uchun sharoit yaratadi, avval bu imkonsiz deb hisoblanilgan edi.
Bunday bombalarning dastlabkilari Ukrainaga 2023-yil bahoridayoq yetkazib berilishi mumkin. Reuters’ning qurol-yarog‘ sohasidagi manbalariga ko‘ra, GLSDB Ukraina uchun yangi qurol ishlab chiqarish bo‘yicha bir nechta variantlardan atigi bittasi, xolos.
Ukrainada jangovar harakatlar cho‘zilib borgani sari, u G‘arbdan tobora ko‘proq qurol-yarog‘ so‘ramoqda. Shu bilan birga, AQSH so‘nggi vaqtlarda o‘z zaxirasidagi qurollar Ukrainaga berilayotgan yordam tufayli, xavfli darajagacha kamayib ketayotgani yuzasidan xavotirlar bildirmoqda.
Avvalroq harbiy yordamning katta qismi Ukrainaga yo‘naltirilgani uchun, AQSH hukumati Tayvanni barcha zarur qurol-yarog‘ bilan ta’minlay olmasligidan xavotirlanayotgani xabar berilgan edi.
Izoh (0)