“Tasavvur qiling, 10 yildan keyin qanday bolalar chiqadi maktablardan”. Shavkat Mirziyoyev ta’limga Finlyandiya tajribasi joriy etilishi haqida

Shavkat Mirziyoyev 25-noyabr kuni Navoiy viloyatiga qilgan tashrifi davomida yoshlar bilan uchrashib, ularga oid davlat siyosati, ta’lim, ish bilan ta’minlashda olib borilayotgan ishlar haqida gapirib o‘tdi.

Hozir ta’lim sohasida 1, 2, 3, 4-sinflar uchun kitoblarni ko‘rdingiz. Men Finlyandiya tajribasini aytgandim, mana, olib keldik. Ular bilan hamkorlik bo‘ldi. Fin oliygohini ochdik. Ular bizga hamkor bo‘lyapti. Endi muallimlarni boshqa yerga yuborib emas, o‘zimizga chetdan mutaxassis olib kelib o‘qitadigan tizim bo‘lyapti.

Yangi kitoblarni ko‘rib, muallimlarning o‘zlari aytyapti bu kitob bizga ma’qul, bolalar dunyoqarashini o‘zgartiradi deya. Tasavvur qiling, 10 yildan keyin qanday bolalar chiqadi bu maktablardan. Hamma narsani qilsa bo‘ladi, ayrim dargohlarga porasiz yaqinlashib bo‘lmas edi, mana hozir oddiy odamning o‘g‘li yoki qizi bilimi bo‘lsa, kirib ketyapti. Bu ham inson qadri uchun qilinayotgan ishlar hisoblanadi, — deydi davlat rahbari.

Prezident, shuningdek, nima uchun hamisha yoshlar bilan uchrashishi sababiga to‘xtaldi.

Chunki ular — ertangi kelajagimiz. Bugun biz ularga ko‘proq e’tibor bermasak, ularni ish bilan ta’minlamasak, ertaga xavf-xatar ko‘payadi. Bugun tashkiliy masala bilan birga o‘zaro muloqot ham qilamiz. Navoiy — ko‘p millatli viloyatlardan biri. Bugungi uchrashuvimizdan men ham rozi bo‘lib ketishim kerak, sizlar ham rozi bo‘lishinglar kerak. Navoiydagi barcha mahallaning dardini baralla aytishimiz kerak. Hozir hamma narsani bamaslahat qilsak, hamma muammoni yechsa bo‘ladi, — deydi Shavkat Mirziyoyev.

• “Bugun yoshlarga ko‘proq e’tibor bermasak, ish bilan ta’minlamasak ertaga xavf-xatar ko‘payadi” — Shavkat Mirziyoyev
• “Hokimga yoshlar bo‘yicha Navoiy viloyati tajribasini joriy etish topshirig‘ini berdim” — Shavkat Mirziyoyev
• “Tomdi, Xatirchi, Uchquduq, G‘ozg‘on, Konimex, Qiziltepa, Navbahor va Nurotadagi 23 ta mahallada ishsiz yoshlar ko‘p” – Shavkat Mirziyoyev