O‘zbekiston delegatsiyasi Singapur ta’lim tajribasini o‘rganishni boshladi (foto)

Ayni kunlarda Ta’lim inspeksiyasi delegatsiyasi Singapurning ta’lim sohasidagi tajribasini joyiga chiqqan holda o‘rganish hamda bu borada hamkorlik aloqalarini yanada takomillashtirish maqsadida ushbu mamlakatda bo‘lib turibdi. Bu haqda inspeksiya matbuot xizmati xabar berdi.

Tashrifdan ko‘zlangan maqsad Singapur ta’lim modelini chuqur o‘rganish, ta’lim sifatini oshirish jarayonlarida ushbu mamlakat tajribasini qo‘llash yuzasidan kelishuvlarga erishish, maktablarda Science va STEM fanlarini o‘qitish metodikalarini tahlil qilish, ta’lim boshqaruvi kadrlarini tayyorlash va malakasini oshirish dasturlarini ushbu mamlakat tajribasi asosida takomillashtirish yuzasidan takliflar ishlab chiqishdan iborat.

Tashrifning dastlabki kunida delegatsiya a’zolari O‘zbekistonning Singapurdagi elchisi Qahramon Shokirov hamrohligida Singapur ta’lim vazirligiga tashrif buyurdi. Vakillarni vazirning xalqaro hamkorlik bo‘yicha maslahatchisi doktor Lian Xui boshchiligidagi mutaxassislar kutib oldi.

Muhokamalar davomida vazirlikning loyihalashtirish bo‘yicha mutaxassisi janob Kvan Qi Xangning Singapur ta’lim tizimi bo‘yicha taqdimoti tinglandi. Shuningdek, vazirlik vakillariga Ta’lim inspeksiyasi bosh boshqarma boshlig‘i Asliddin Odilov tomonidan O‘zbekiston ta’lim tizimi bo‘yicha taqdimot qilib berildi.

Uchrashuv davomida tomonlar o‘zlarini qiziqtirgan savollar bilan o‘rtoqlashdi. Kunning ikkinchi yarmida delegatsiya a’zolari Singapur davlat imtihonlari va baholash kengashiga tashrif buyurdi. Ushbu tashkilot rahbari boshchilikdagi mutaxassislar kengash faoliyatiga oid taqdimot qildi hamda tomonlar o‘zlarini qiziqtirgan savollarga javob oldi.

Shundan so‘ng delegatsiya a’zolariga imtihon javob varaqalarini tekshirishning elektronlashtirilgan (OnScreen Marking) tizimi va bevosita ekspertlar tomonidan tekshirish jarayonlari tanishtirib o‘tildi.