Айни кунларда Таълим инспекцияси делегацияси Сингапурнинг таълим соҳасидаги тажрибасини жойига чиққан ҳолда ўрганиш ҳамда бу борада ҳамкорлик алоқаларини янада такомиллаштириш мақсадида ушбу мамлакатда бўлиб турибди. Бу ҳақда инспекция матбуот хизмати хабар берди.
Ташрифдан кўзланган мақсад Сингапур таълим моделини чуқур ўрганиш, таълим сифатини ошириш жараёнларида ушбу мамлакат тажрибасини қўллаш юзасидан келишувларга эришиш, мактабларда Science ва STEM фанларини ўқитиш методикаларини таҳлил қилиш, таълим бошқаруви кадрларини тайёрлаш ва малакасини ошириш дастурларини ушбу мамлакат тажрибаси асосида такомиллаштириш юзасидан таклифлар ишлаб чиқишдан иборат.
Ташрифнинг дастлабки кунида делегация аъзолари Ўзбекистоннинг Сингапурдаги элчиси Қаҳрамон Шокиров ҳамроҳлигида Сингапур таълим вазирлигига ташриф буюрди. Вакилларни вазирнинг халқаро ҳамкорлик бўйича маслаҳатчиси доктор Лиан Хуи бошчилигидаги мутахассислар кутиб олди.
Муҳокамалар давомида вазирликнинг лойиҳалаштириш бўйича мутахассиси жаноб Кван Қи Хангнинг Сингапур таълим тизими бўйича тақдимоти тингланди. Шунингдек, вазирлик вакилларига Таълим инспекцияси бош бошқарма бошлиғи Аслиддин Одилов томонидан Ўзбекистон таълим тизими бўйича тақдимот қилиб берилди.
Учрашув давомида томонлар ўзларини қизиқтирган саволлар билан ўртоқлашди. Куннинг иккинчи ярмида делегация аъзолари Сингапур давлат имтиҳонлари ва баҳолаш кенгашига ташриф буюрди. Ушбу ташкилот раҳбари бошчиликдаги мутахассислар кенгаш фаолиятига оид тақдимот қилди ҳамда томонлар ўзларини қизиқтирган саволларга жавоб олди.
Шундан сўнг делегация аъзоларига имтиҳон жавоб варақаларини текширишнинг электронлаштирилган (OnScreen Marking) тизими ва бевосита экспертлар томонидан текшириш жараёнлари таништириб ўтилди.
Изоҳ (0)