Estoniyada 240 dan ortiq sovet yodgorligi buzib tashlanadi yoki almashtiriladi

Estoniya davlat kanselyariyasi qoshidagi ishchi guruh mamlakatdagi 322 ta sovet yodgorligidan 244 tasini buzib tashlash yoki almashtirishni tavsiya qildi, deb yozmoqda Meduza.

Estoniyaning ERR teleradiokompaniyasi ma’lumotlariga ko‘ra, “snos”ga tavsiya etilgan 244 ta yodgorlikdan 56 tasi allaqachon olib tashlangan.

Yana 74 ta sovet yodgorligi neytral deb tan olingan. Ishchi guruh materiallariga ko‘ra, shuningdek, to‘rtta yodgorlik qo‘shimcha muhokamalarni talab qilmoqda.

Ishchi guruh a’zolari Saaremaa orolidagi Tahumardi yodgorligi va yaqin atrofdagi ommaviy qabrni, shunga o‘xshash bir qancha sovet yodgorliklarini saqlab qolishni tavsiya qildi.

Ishchi guruhi ekspertizadan o‘tkazilgan 322 ta obyektdan 213 tasi harbiy qabr va yodgorliklardan, 96 tasi esa memoriallardan iborat ekanini ma’lum qildi.

Avgust oyida Estoniya hukumati Rossiya bilan chegaradagi Narva shahridan sovet yodgorligi — Ikkinchi jahon urushidagi g‘alabaning 25 yilligi munosabati bilan o‘rnatilgan T-34 tankini olib tashlagan edi. T-34 ning ko‘chirilishiga bir qancha aholi va Narva meri qarshilik ko‘rsatgan.