O‘zbekiston terma jamoasi Toshkentda Rossiya bilan o‘rtoqlik o‘yini o‘tkazadi

Futbol bo‘yicha O‘zbekiston milliy terma jamoasi Rossiyaga qarshi o‘rtoqlik o‘yinida ishtirok etadi. Bu haqda O‘FA matbuot xizmati ma’lum qildi.

Srechko Katanech qo‘l ostidagi jamoa 13-noyabr kuni Toshkentda yig‘inga kirishadi. Mazkur FIFA kunlarida “oq bo‘rilar” ikkita o‘rtoqlik o‘yinida ishtirok etadi.

16-noyabr kuni Qozog‘iston terma jamoasiga qarshi o‘yin bo‘lib o‘tadi. 20-noyabr kuni esa Rossiya terma jamoasi O‘zbekiston bilan o‘ynaydi.

Rossiyaga qarshi o‘yin “Paxtakor” stadionida bo‘lib o‘tadi. Uchrashuv 17:00 da boshlanadi.

Eslatib o‘tamiz, Rossiyaning Ukrainadagi harbiy harakatlari sabab Rossiya terma jamoasi FIFA va UEFA tasnifidagi musobaqalarda chetlatilgan. Biroq terma jamoaga xalqaro o‘rtoqlik o‘yinlari o‘tkazishga taqiqi qo‘yilmagan.

Avvalroq Bosniya va Gersegovina terma jamoasi Rossiyaga qarshi o‘rtoqlik o‘yini o‘tkazishdan bosh tortgandi.