Jizzaxning Sharof Rashidov tumanida soxta diplom yasab sotish bilan shug‘ullanib kelgan jinoiy guruh fosh etildi. Bu haqda viloyat IIB matbuot xizmati xabar berdi.
Qayd etilishicha, viloyat IIB uyushgan jinoyatchilikka qarshi kurashish bo‘limi xodimlari tomonidan Sharof Rashidov tumanida tezkor tadbir o‘tkazilgan. Tadbirda fuqarolardan biriga diplom yasab berish evaziga undan 500 dollar, pasport va shahodatnoma nusxasini olgan ayol ushlangan.
Tadbir davomida tumanning “Sug‘diyona” mahallasida yashovchi ushbu ayol fuqarodan olgan pulining 100 dollarini o‘zida qoldirib, 400 dollar va hujjatlarni hamkasbiga berishini ma’lum qilgan. Shundan so‘ng tezkor tadbir davom ettirilib, kasb-hunar maktabi mansabdori ashyoviy dalillar bilan ushlangan.
Sharof Rashidov tumanida istiqomat qiluvchi bu ayol ham pullar va hujjatlarni Jizzax shahrining “Zargarlik” mahallasida yashovchi MCHJ rahbari bo‘lgan tanishiga bergan vaqtida qo‘lga olingan.
1981-yilda yilda tug‘ilgan MCHJ rahbari avval ham jinoyat sodir etgani uchun axloq tuzatish jazosini o‘tayotgan bo‘lgan. Olib borilgan tergovga qadar dastlabki surishtiruvda kasb-hunar maktabining ikki nafar mas’uli va MCHJ rahbari o‘zaro til biriktirib, 10 kishiga ular o‘qimagan bo‘lsa-da, diplom tayyorlab bergani aniqlangan.
Ushbu diplomlarning 1 tasi Jizzax shahar uy-joy kommunal xo‘jaligi, 6 tasi Jizzax maishiy xizmat, 2 tasi Jizzax tumani iqtisodiyot, 1 tasi Jizzax transport va aloqa kasb-hunar kollejlari tomonidan rasmiylashtirilgan.
Hozirda holat yuzasidan tergovga qadar tekshiruv harakatlari o‘tkazilmoqda.
Mavzuga doir: Sirdaryoda institutni tugatganlik haqida soxta diplom olib bermoqchi bo‘lganlar ushlandi
Izoh (0)