Joriy yilning 31-oktabr sanasida Valdorf (Germaniya) shahrida UzAuto va dunyodagi eng yirik qishloq xo‘jaligi texnikasini ishlab chiqaruvchi John Deere Walldorf GmbH & Co sho‘ba korxonasi o‘rtasida hamkorlik shartnomasini imzolash marosimi bo‘lib o‘tdi. U qishloq xo‘jaligi mashinasozligi sohasidagi ilg‘or bilimlar, tajriba va nou-xauga ega.
John Deere kompaniyasiga 1837-yilda asos solingan bo‘lib, u qishloq xo‘jaligi texnikasini ishlab chiqarish bo‘yicha jahonda yetakchi hisoblanadi. Kompaniyada 75 mingdan ortiq xodim ishlaydi. 2021-yil yakuniga ko‘ra, kompaniyaning sof daromadi 44 mlrd AQSH dollarini, sof foyda esa 6 mlrd AQSH dollarini tashkil etgan. Kompaniya tomonidan R&D ni rivojlantirishga alohida e’tibor qaratiladi, birgina, 2021-yilning o‘zida taxminan 2 mlrd AQSH dollariga teng xarajat bo‘lgan.
Imzolangan shartnoma doirasida tomonlar O‘zbekiston Respublikasida John Deere savdo belgisi ostida qishloq xo‘jaligi texnikasini yig‘uv ishlab chiqarish va realizatsiya qilishni tashkillashtirish borasida hamkorlikni kelishib olishdi. Bu UzAuto’ni Markaziy Osiyo mintaqasida John Deere texnikasini ishlab chiqarish bo‘yicha yagona hamkorga aylantiradi.
UzAuto tomonidan avtomobilsozlik korxonalarini boshqarishning yuqori samaradorligi, shuningdek, qishloq xo‘jaligi mashinasozligi klasteri transformatsiyasining natijadorligi O‘zbekiston uchun manfaatli shartlar asosida hamkorlik o‘rnatishga imkon yaratdi.
Tomonlar 6140 V rusumli traktorlar va W430 rusumli don yig‘ish kombaynlarini yig‘uv ishlab chiqarishni 25-30 foizgacha mahalliylashtirish darajasi bilan tashkillashtirish to‘g‘risida kelishib olishdi. Bundan tashqari, 2026-yildan boshlab, O‘zbekistonda John Deere paxta terish kombaynining yangi modelini yig‘uv ishlab chiqarish o‘zlashtiriladi.
Yuqorida sanab o‘tilgan modellarni Chirchiqda yaratilgan AgroTechClaster ishlab chiqarish quvvatlarida yig‘uv ishlab chiqarishni tashkillashtirish bo‘yicha kelishuvga erishilgani munosabati bilan, komponent va butlovchi qismlarni ishlab chiqarishda nou-xau va tovar belgilaridan foydalanish uchun eksklyuziv huquqlar taqdim etiladi. O‘zbekistonda John Deere qishloq xo‘jaligi texnikasining tanlangan modellari savdosi (jumladan, import) ushbu korxonaga topshiriladi.
Bu klasterga John Deere qishloq xo‘jaligi texnikasini yig‘uv ishlab chiqarishni yo‘lga qo‘yish uchun ishlab chiqarish maydonchasini zarur standartlar asosida modernizatsiya qilish imkonini beradi va kelgusida tanlangan mahsulotni xorijga eksport qilish imkoniyatini ta’minlaydi. Birinchi bosqichda mahalliy ishlab chiqarishga mansub texnikaning ma’lum modellari eksportini Turkmaniston va Tojikistonga amalga oshirishni kelishish rejalashtirilmoqda.
Ushbu maqsadlarga erishish, shuningdek, zarur butlovchi va ehtiyot qismlarni ishlab chiqarishni yaxshilash uchun mahalliy ishlab chiqaruvchilar jalb etiladi.
Bundan tashqari, yetakchi xalqaro kompaniyaning jalb qilinishi ishlab chiqarish negizida dual ta’limni tashkillashtirish hamda xorij mutaxassislari bilan tajriba almashish orqali texnik-muhandislik sohasida o‘zbek mutaxassislari salohiyatini yangi bosqichga olib chiqish imkonini beradi. Shu maqsadda John Deere o‘zining rasmiy “Landtex” OAJ bilan hamkorlikda O‘zbekistonda mahalliy mutaxassislar va mijozlarni o‘qitish uchun “Ilg‘or tajriba va kompetensiyalar markazi”ni tashkil etadi, shuningdek, sotuvdan keyin keng qamrovli xizmat ko‘rsatishni yo‘lga qo‘yadi hamda zarur ehtiyot qismlarni yetkazib berishni ta’minlaydi.
Kelajakda O‘zbekistonda John Deere qishloq xo‘jaligi texnikasi sotuvlarini rag‘batlantirish maqsadida John Deere Financial moliya instrumentlarini jalb qilish rejalashtirilmoqda.
O‘zbekiston Respublikasi Prezidentining 2021-yilning 11-noyabridagi PQ-7-sonli qarorida mahalliy ishlab chiqaruvchilardan qishloq xo‘jaligi texnikasini xarid qilishda iste’molchilarning quyidagi xarajatlarini subsidiyalash ko‘zda tutilgan: qishloq xo‘jaligi texnikasi qiymatining 15%i; kredit yoki lizing shartlari asosida qishloq xo‘jaligi texnikalari xarid qilinganda foiz xarajatlarining 10 foiz punktidan ortiq qismi.
Bundan tashqari, tomonlar mahalliy bozordagi mavjud va mavsumiy talabdan kelib chiqqan holda, John Deere maxsus shartlar asosida texnikaning boshqa modellarini ham import qilish haqida kelishib olishdi.
Erishilgan kelishuvlar yuqori sifatli qishloq xo‘jaligi texnikasini ishlab chiqarish va realizatsiya qilish, shuningdek, raqamli xizmatlardan foydalanish imkoniyati, 24/7 tartibidagi texnik ko‘mak va rivojlangan John Deere servis tuzilmasining ehtiyot qismlari tufayli mijozlarga xizmat ko‘rsatish sifatini maksimal darajada oshirish imkonini beradi.
Izoh (1)
Haqli oʻldirilgan xijobdan voz kechishga chaqirganku