UzAuto ва John Deere ўртасида ҳамкорлик шартномаси имзоланди

Жорий йилнинг 31 октябрь санасида Валдорф (Германия) шаҳрида UzAuto ва дунёдаги энг йирик қишлоқ хўжалиги техникасини ишлаб чиқарувчи John Deere Walldorf GmbH & Cо шўъба корхонаси ўртасида ҳамкорлик шартномасини имзолаш маросими бўлиб ўтди. У қишлоқ хўжалиги машинасозлиги соҳасидаги илғор билимлар, тажриба ва ноу-хауга эга.

John Deere компаниясига 1837 йилда асос солинган бўлиб, у қишлоқ хўжалиги техникасини ишлаб чиқариш бўйича жаҳонда етакчи ҳисобланади. Компанияда 75 мингдан ортиқ ходим ишлайди. 2021 йил якунига кўра, компаниянинг соф даромади 44 млрд АҚШ долларини, соф фойда эса 6 млрд АҚШ долларини ташкил этган. Компания томонидан R&D ни ривожлантиришга алоҳида эътибор қаратилади, биргина, 2021 йилнинг ўзида тахминан 2 млрд АҚШ долларига тенг харажат бўлган.

Имзоланган шартнома доирасида томонлар Ўзбекистон Республикасида John Deere савдо белгиси остида қишлоқ хўжалиги техникасини йиғув ишлаб чиқариш ва реализация қилишни ташкиллаштириш борасида ҳамкорликни келишиб олишди. Бу UzAuto’ни Марказий Осиё минтақасида John Deere  техникасини ишлаб чиқариш бўйичa ягона ҳамкорга айлантиради.

UzAuto томонидан автомобилсозлик корхоналарини бошқаришнинг юқори самарадорлиги, шунингдек, қишлоқ хўжалиги машинасозлиги кластери трансформациясининг натижадорлиги Ўзбекистон учун манфаатли шартлар асосида ҳамкорлик ўрнатишга имкон яратди.

Томонлар 6140 V русумли тракторлар ва W430 русумли дон йиғиш комбайнларини йиғув ишлаб чиқаришни 25-30 фоизгача маҳаллийлаштириш даражаси билан ташкиллаштириш тўғрисида келишиб олишди. Бундан ташқари, 2026 йилдан бошлаб, Ўзбекистонда John Deere пахта териш комбайнининг янги моделини йиғув ишлаб чиқариш ўзлаштирилади.

Юқорида санаб ўтилган моделларни Чирчиқда яратилган AgroTechClaster ишлаб чиқариш қувватларида йиғув ишлаб чиқаришни ташкиллаштириш бўйича келишувга эришилгани муносабати билан, компонент ва бутловчи қисмларни ишлаб чиқаришда ноу-хау ва товар белгиларидан фойдаланиш учун эксклюзив ҳуқуқлар тақдим этилади. Ўзбекистонда John Deere қишлоқ хўжалиги техникасининг танланган моделлари савдоси (жумладан, импорт) ушбу корхонага топширилади.

Бу кластерга John Deere қишлоқ хўжалиги техникасини йиғув ишлаб чиқаришни йўлга қўйиш учун ишлаб чиқариш майдончасини зарур стандартлар асосида модернизация қилиш имконини беради ва келгусида танланган маҳсулотни хорижга экспорт қилиш имкониятини таъминлайди. Биринчи босқичда маҳаллий ишлаб чиқаришга мансуб техниканинг маълум моделлари экспортини Туркманистон ва Тожикистонга амалга оширишни келишиш режалаштирилмоқда.

Ушбу мақсадларга эришиш, шунингдек, зарур бутловчи ва эҳтиёт қисмларни ишлаб чиқаришни яхшилаш учун маҳаллий ишлаб чиқарувчилар жалб этилади.

Бундан ташқари, етакчи халқаро компаниянинг жалб қилиниши ишлаб чиқариш негизида дуал таълимни ташкиллаштириш ҳамда хориж мутахассислари билан тажриба алмашиш орқали техник-муҳандислик соҳасида ўзбек мутахассислари салоҳиятини янги босқичга олиб чиқиш имконини беради. Шу мақсадда John Deere ўзининг расмий «Ландтех» ОАЖ билан ҳамкорликда Ўзбекистонда маҳаллий мутахассислар ва мижозларни ўқитиш учун «Илғор тажриба ва компетенсиялар маркази»ни ташкил этади, шунингдек, сотувдан кейин кенг қамровли хизмат кўрсатишни йўлга қўяди ҳамда зарур эҳтиёт қисмларни етказиб беришни таъминлайди.

Келажакда Ўзбекистонда John Deere қишлоқ хўжалиги техникаси сотувларини рағбатлантириш мақсадида John Deere Financial молия инструментларини жалб қилиш режалаштирилмоқда.

Ўзбекистон Республикаси Президентининг 2021 йилнинг 11 ноябридаги ПҚ-7-сонли қарорида маҳаллий ишлаб чиқарувчилардан қишлоқ хўжалиги техникасини харид қилишда истеъмолчиларнинг қуйидаги харажатларини субсидиялаш кўзда тутилган: қишлоқ хўжалиги техникаси қийматининг 15%и; кредит ёки лизинг шартлари асосида қишлоқ хўжалиги техникалари харид қилинганда фоиз харажатларининг 10 фоиз пунктидан ортиқ қисми.

Бундан ташқари, томонлар маҳаллий бозордаги мавжуд ва мавсумий талабдан келиб чиққан ҳолда, John Deere махсус шартлар асосида техниканинг бошқа моделларини ҳам импорт қилиш ҳақида келишиб олишди.

Эришилган келишувлар юқори сифатли қишлоқ хўжалиги техникасини ишлаб чиқариш ва реализация қилиш, шунингдек, рақамли хизматлардан фойдаланиш имконияти, 24/7 тартибидаги техник кўмак ва ривожланган John Deere сервис тузилмасининг эҳтиёт қисмлари туфайли мижозларга хизмат кўрсатиш сифатини максимал даражада ошириш имконини беради.