NASA Turkmanistonda yirik hajmda metan sizib chiqqanini aniqladi

NASA 25-oktabr kuni Turkmanistonning Xazar shahri yaqinida katta hajmda metan sizib chiqqanini ma’lum qildi, deb yozadi “Xronika Turkmenistana”.

Sun’iy yo‘ldoshga o‘rnatilgan spektrometrlar ushbu hududda gaz manbalaridan chiqqan va 32 kilometrdan ortiq masofaga yoyilgan 12 ta shleyfni aniqlagan. NASA mutaxassislari hisob-kitoblariga ko‘ra, bu soatiga 50,4 tonna metan otilib chiqayotganini bildiradi.

Taxminan shunday hajmdagi metan AQSHda 2015-yil Aliso kanyonida sodir bo‘lgan eng yirik avariyalardan birida sizib chiqqandi.

Nashr eslatishicha, Bloomberg nashri fevral oyida o‘tkazgan surishtiruvlarga muvofiq, metan sizib chiqqani aniqlangan, Kaspiy dengizi bo‘yidagi konlarning barchasi “Turkmangaz” va “Turkmanneft” davlat kompaniyalari tomonidan qazilmoqda. Jurnalistlar kompaniyalar rahbariyatlarini eskirgan uskunalardan foydalanishda, ishchilarni esa mas’uliyatsizlikda aybladi. 2017-yil yanvaridan 2020-yil noyabrigacha ushbu hududda jami 944 marta metan sizib chiqishi kuzatilgan.

2021-yil noyabrida o‘sha paytda bosh vazir o‘rinbosari bo‘lgan Serdar Berdimuhamedov BMTning Glazgodagi iqlim sammitida metan sizib chiqishini kamaytirishga va’da bergandi. Shundan keyin ikki hafta o‘tib, Bolqon viloyatining Kiyanli qishlog‘ida Malayziyaning Petronas Carigali kompaniyasi terminalida ikkilamchi neft gazi katta hajmda ajralib chiqqan edi.

“Turkmangaz” va “Turkmanneft” davlat kompaniyalari, shuningdek, mamlakat Tashqi ishlar vazirligi ekspertlarning metan sizib chiqishi yuzasidan yozma murojaatlari va telefon qo‘ng‘iroqlarini e’tiborsiz qoldirgan.

Ayni vaqtda esa Turkmaniston rasmiylari Parij bitimi bo‘yicha majburiyatlarni bajarish uchun 2030-yilgacha issiqxona gazlari ajralib chiqishini kamaytirish rejalarini ma’lum qilmoqda. Biroq bu borada aniq ko‘rsatkichlar oshkor etilgani yo‘q.