Qurilish vazirligi Toshkentdagi fuqarolar noroziligiga sabab bo‘layotgan ko‘p qavatli bino yuzasidan ma’lumot berdi

Ijtimoiy tarmoqlarda Toshkent shahrida fuqarolar turar-joylari oldida ko‘p qavatli uy qurilayotgani, shu sababli fuqarolar uylari “akvarium”ga aylanayotgani haqida xabarlar tarqaldi. Qurilish vazirligi holatga munosabat bildirdi.

Ma’lum bo‘lishicha, Toshkent shahar Yakkasaroy tumani Glinka va Torobiy ko‘chalarida joylashgan Royal Towers MCHJga tegishli qurilish obyektiga Toshkent shahar Qurilish bosh boshqarmasi loyiha-smeta hujjatlarini kelishish bo‘yicha Arxitektura va shaharsozlik kengashi ishchi organining 2020-yil 24-martda 31-698/A-sonli xulosasi berilgan. Shuningdek, 144/11-09-sonli yig‘ma ekspert xulosasi ham taqdim etilgan.

Toshkent shahar Qurilish sohasida hududiy nazorat inspeksiyasini xabardor etgan holda qurilish-montaj ishlari boshlangan va inspeksiya tomonidan tizimli nazorat o‘rnatilgan va 11 ta yozma ko‘rsatma berilgan.

Toshkent shahar Qurilish sohasida hududiy nazorat inspeksiya tomonidan oraliq masofasidagi holat bo‘yicha Toshkent shahar Qurilish bosh boshqarmasiga 2022-yilda 1-iyulda taqdimnoma yuborilgan.

Hozirgi kunda holat yuzasidan aniqlik kiritilgunga qadar qurilish-montaj ishlari vaqtincha to‘xtatilgan.