Qoraqalpog‘istondagi tartibsizliklarda gumonlangan yana 38 nafar fuqaro ozod qilindi

Qoraqalpog‘istonda bo‘lib o‘tgan tartibsizliklarda gumonlangan yana 38 nafar fuqaro o‘z oilasiga qaytarildi. Bu haqda Jo‘qorg‘i Kenges axborot xizmati xabar berdi.

Qayd etilishicha, gumonlanuvchilar Jo‘qorg‘i Kenges raisining iltimosi va deputatlar kafilligida insoniylik tamoyili asosida ozod qilingan.

Namoyishlarda qatnashganlikda gumonlanib, olib ketilgan shaxslarning o‘z qilmishidan pushaymon ekanligi, oila a‘zolarining murojaatlari, ularning oilada yolg‘iz boquvchi ekanligi, voyaga yetmagan farzandlari borligi inobatga olingan.

Kun davomida dastlab 22 kishi so‘ngra, Qorao‘zak, Chimboy, Kegeyli, Xo‘jayli, Shumanay, Qonliko‘l va Nukus tumanlarida yashovchi 16 nafar fuqaro oilasi bag‘riga qaytgan.

Avvalroq Qoraqalpog‘istondagi namoyishlarda qatnashganlikda gumonlangan 34 nafar fuqaro jamoatchilik kafilligi orqali oilalari bag‘riga qaytarilgan edi.