Hindiston hukumati Maiden Pharmaceuticals kompaniyasiga qarashli zavodda yo‘talga qarshi sirop ishlab chiqarishni to‘xtatdi — sirop Gambiyada 69 ga yaqin bolaning o‘limiga sabab bo‘lgan bo‘lishi mumkin, deb yozmoqda Deutsche Welle.
Hindiston sog‘liqni saqlash idoralari Maiden Pharma kompaniyasining asosiy zavodida barcha dorilarni ishlab chiqarishni to‘xtatdi. Hindiston shimolidagi Haryana shtati ichki ishlar vaziri Anil Vijning ta’kidlashicha, rasmiylar bu oyda zavodni to‘rt marta tekshirgan va 12 ta buzilishni aniqlagan.
“Buni hisobga olgan holda kompaniyadagi barcha ishlab chiqarishlar taqiqlandi va bildirishnoma berildi”, — dedi Vij.
Maiden Pharma o‘z mahsulotlarini ichki bozorda sotadi, shuningdek, Osiyo, Afrika va Lotin Amerikasiga eksport qiladi. Haryana shtatida kompaniyaning yana ikkita ishlab chiqarish zavodi mavjud.
O‘tgan hafta Jahon sog‘liqni saqlash tashkiloti (JSST) Maiden Pharma tomonidan ishlab chiqarilgan shamollash va yo‘talga qarshi siroplar Gambiyada kamida 66 nafar bolaning o‘limiga aloqador bo‘lishi mumkinligi haqida hisobot e’lon qilgandi.
JSSTning ta’kidlashicha, to‘rtta Maiden mahsulotining laboratoriya tahlili ularda buyraklarga jiddiy zarar yetkazishi mumkin bo‘lgan va hayot uchun xavfli ifloslantiruvchi moddalar mavjudligini ko‘rsatgan.
Farmatsevtika kompaniyasi direktori hind matbuotining ayblovlarini rad etdi.
Izoh (0)