Bugun,

  • USD 11095.31
  • RUB 173.84
  • EUR 10772.44

Sirdaryo viloyati hokimligi Moliya boshqarmasi boshlig‘i lavozimida ishlab, nohaq sudlanib keyin oqlangan Abdurauf Tojiyev o‘z lavozimiga qayta tiklandi. Bu haqda huquqshunos Saidali Muxtoraliyev “Daryo”ga ma’lum qilmoqda.

Saidali Muxtoraliyev va Abdurauf Tojiyev

Saidali Muxtoraliyev va Abdurauf Tojiyev
Foto: Shaxsiy arxiv

Ma’lum bo‘lishicha, Abdurauf Tojiyev Sirdaryo viloyati hokimligi Moliya boshqarma boshlig‘i lavozimida ishlagan. U sudlangan, keyinchalik 4 yil avval sud tomonidan to‘liq aybsiz deb topilib, oqlangan. Oqlanganidan so‘ng, u kishi o‘z ishiga tiklanish uchun sudga da’vo kiritgan va fuqarolik sudi uni o‘z ishiga tiklash haqida qaror chiqargan.

Ish beruvchi apellyatsiya shikoyati bergan, apellyatsiya sudi ham xodimni haq degan qarorga kelgan. Biroq ish beruvchi oradan 1 yil o‘tsa ham xodimni o‘z ishiga tiklamagan. Uning ta’siri katta bo‘lgani uchunmi, keyinchalik Oliy sud kassatsiya hay’ati quyi sudlarning qarorlarini o‘zgartirib, xodimni “avvalgi ishiga teng bo‘lgan lavozimiga tiklash haqida” qaror chiqargan. Ammo xodimni o‘z ishiga ham tiklashmagan, teng lavozimga ham qo‘yishmagan.

Huquqshunos, Saidali Muxtoraliyevning ta’kidlashicha, o‘shanda Oliy sud kassatsiya hay’ati mutlaqo noqonuniy qarorga kelgan, ya’ni xodim aynan o‘zining lavozimiga tiklanishi shart edi, boshqa lavozimga emas:

Qonunchilikda teng lavozimga tiklash haqida faqat ikkita qoida bor: birinchisi, Jinoyat protsessual koleksining 310-moddasi, ikkinchisi esa Mehnat kodeksining 271-moddasi. Ikkala modda bo‘yicha nohaq sudlangan xodimni ishga tiklashda qachonki, korxona tugatilgan bo‘lsa, xodimning ish o‘rni qisqartirilgan bo‘lsa va keyingisi, uni aynan o‘z lavozimiga tiklashga mone’lik qiladigan qonunda nazarda tutilgan aniq asoslar bo‘lsagina, xodimni lavozimiga teng bo‘lgan boshqa lavozimga tiklash mumkin. Lekin Abdurauf Tojiyevning ishida ana shu 3 ta holatning birortasi ham bo‘lmagan, ya’ni uni o‘zining ishi qolib, boshqa lavozimga tiklash uchun hech qanday asos, shu jumladan, o‘z ishiga tiklashga to‘sqinlik qiladigan biror-bir qonunda ko‘rsatilgan asos yo‘q edi.

Oliy sud kassatsiya hay’ati bu masalaga umuman e’tibor qaratmagan va “teng lavozimga tiklansin” deb qaror chiqargan. Qiziq jihati, Fuqarolik protsessual kodeksining 405-moddasiga asosan javobgar ish beruvchi ishga tiklashga doir birinchi instansiya sudi qarori ustidan kassatsiya shikoyati berish uchun o‘sha birinchi sudining hal qiluv qarorini ijro qilib, ya’ni xodimni ishga tiklab, uning tiklanganligi haqidagi buyruq nusxasini kassatsiya shikoyatiga ilova qilishi shart. Aks holda, Oliy sud tomonidan bunday kassatsiya shikoyati ish yurituvga qabul qilinmaydi va shikoyat qanoatlantirilmaydi. Biroq Oliy sudning kassatsiya sudi ushbu qoidaga amal qilmay, ish beruvchining asossiz shikoyatini qanoatlantirib bergan. Ular, xodim ishiga tiklanmay turib, ishni kassatsiya tartibida ko‘rgan va Fuqarolik protsessual kodeksining 405-moddani qo‘pol ravishda buzgan.

To‘rt yil sarson bo‘lgan Abdurauf Tojiyev Oliy sudning raisi Baxtiyor Islamovning qabuliga kirib, muammoni atroflicha tushuntirgan. Natijada Oliy sud raisi o‘rinbosari tomonidan oldingi kassatsiya sudining noqonuniy qarorini bekor qilish va ishni takroriy kassatsiya tartibida ko‘rish yuzasidan protest kiritilgan.

Ish 12-oktabr kuni Oliy sud sudyasi G.Parpiyeva raisligida 5 nafar sudyalar ishtirokida takroran kassatsiya tartibida ko‘rib chiqilgan. Unda avvalgi kassatsiya qarori bekor qilinib, Abdurauf Tojiyevni aynan o‘zining Sirdaryo viloyati Moliya boshqarma boshlig‘i lavozimiga tiklash belgilangan.

Qo‘shimcha qilinishicha, Abdurauf Tojiyev sarsongarchilikda o‘tgan yillari va ishsiz qolgan davri uchun moddiy zararni undirish uchun sudga da’vo kiritmoqchi.

Avvalroq Oliy sud Sog‘liqni saqlash vazirligining noqonuniy bo‘shatilgan ikki xodimi ishga qayta tiklab, ularga yetkazilgan 338 million so‘mlik moddiy zarar qoplab berilishi haqida qaror qabul qilgan edi.

Izoh
Asosiy yangiliklar
Dunyo
“Turkiya yangi dunyo tartibining markazida bo‘lishi kerak” — Erdo‘g‘on
Mahalliy
Andijonda 41 kishi jarohatlangan avtohalokat qurbonlari soni 4 nafarga yetdi
Mahalliy
O‘zbekistonda pomidor narxi barqarorlashdi