Qashqadaryo viloyatining Kasbi tumani hokimi To‘xtamurod Meyliyev kecha, 12-oktabr kuni Qarshi shahridagi Jurnalistlar uyida OAV vakillari bilan uchrashib, ularni qiziqtirgan savollarga javob berdi. Bu haqda “Daryo”ga bloger Azizbek Yazdurdiyev xabar berdi.
Ma’lum qilinishicha, To‘xtamurod Meyliyev jurnalist va blogerlarga tumanda “Obod qishloq”, “Obod mahalla” loyihalari doirasida amalga oshirilayotgan ishlar haqida ma’lumot bergach, OAV vakillarini qiziqtirgan savollarga javob bergan.
Tadbirda so‘z olgan bloger Azizbek Yazdurdiyev hokim To‘xtamurod Meyliyevga savol berib, turizm masalasidagi kamchiliklari bois prezident Shavkat Mirziyoyev raisligidagi videoselektorda ishdan olingani va o‘zgarishi uchun uch oylik sinov muddati qaysi xatosi uchun bo‘lgan deb o‘ylashini, shuningdek, “Daryo” nashrining bu haqdagi savollariga nega javob berolmagani sababini so‘ragan.
Haqiqatan ham turizm sohasida qiladigan ishlarimiz ko‘p. Shaxsan o‘zim ham inson sifatida qayergadir bormoqchi bo‘lsam avvalo shu hududning turistik salohiyatini ko‘rsatuvchi roliklarni ko‘raman. Bugun hammamizda telefon va internet bor, shunday paytlarda tezda internetga kirib yaxshi joylarni izlay boshlaymiz. Shu sabab biz ham tumanning turistik salohiyatini ochib beruvchi 1,5 daqiqalik rolik tayyorlayapmiz. Shuni tarqatish masalasida televideniyega ham iltimos qilyapmiz. Obunachilaringiz ko‘pligi sabab sizlardan ham iltimos qilardik, — deydi tuman hokimi turizm masalasidagi savolga javob berar ekan.Hokim “Daryo” nashri so‘roviga bepisandlik qilganining sababiga ham to‘xtalgan.
Haqiqatan ham shu masalada bizga savollar berilgandi. Aynan muxbirning o‘zi bilan gaplasholmadik. Qolaversa o‘sha kunlari mehmonlarimiz ko‘paygan edi. Vaqt ajratolmadik. Ammo bu bepisandlik emas. Shu masalada menga Usmon aka ham (AOKAning viloyat boshqarmasi boshlig‘i. “Daryo” izohi) telefon qilib, ma’lum qilgandi. Albatta bog‘lanib, savollarga javob beramiz degandik. Ammo o‘sha kuni kechki payt bu haqidagi maqola chiqqan ekan, — deydi hokim.Hokim qo‘l ostidagi xodimlari maqolaga raddiya berish kerakligini aytganini, ammo o‘zi aybini tan olib, raddiya masalasini rad etganini bildirgan.
Bular raddiya beramiz deyishdi. Lekin men mavridi kelganda bu haqda gapirishimizni aytdim. Mana bugun mavridi kelgan ekan, shu savolga ham aniqlik kiritib oldik. Men doim ommaviy axborot vositalariga ochiq bo‘lishga, ularning har qanday so‘roviga o‘z vaqtida javob berishga harakat qilaman. Boisi biz matbuotga qancha yopiq bo‘lsak, shuncha o‘zimizga zarar yetkazgan bo‘lamiz, — degan To‘xtamurod Meyliyev.2022-yilning 19-sentabr kuni Shavkat Mirziyoyev raisligida bo‘lib o‘tgan ichki va tashqi turizm salohiyatini yanada oshirish chora-tadbirlari haqidagi videoselektorda bir necha hokimlar ishi tanqid qilinib, 14 nafari ishdan olingandi. Shundan so‘ng Samarqand viloyatining Urgut tumani hokimi, Namangan viloyatining To‘raqo‘rg‘on va Kosonsoy tumani hokimlari OAV orqali chiqish qilib, tanqiddan qilingan xulosasini, shuningdek, uch oylik sinov muddatida qaysi ishlarni amalga oshirib, xatosini tuzatmoqchi ekani haqida axborot bergandi.
“Daryo” mazkur masala yuzasidan so‘rovini davom ettirib, prezident tanqidiga duchor bo‘lgan qashqadaryolik hokimlar — Kasbi, Qamashi, Shahrisabz va Yakkabog‘ tumani rahbarlariga murojaat qilgandi. Va atigi 2 ta savol bergandi. Muxbir hokimlarga turizmni rivojlantirish borasidagi qaysi kamchiligim uchun prezident tanqidiga uchradim deb o‘ylashiyu, berilgan uch oylik muddatda nimalar qilib, davlat rahbari va tuman aholisi ishonchiga erishaman deb rejalashtirayotgani bilan qiziqqandi. Kasbi tumani hokimi Qamashi va Yakkabog‘ hokimlari qatori “Daryo”ning bu haqdagi so‘roviga javob berolmagandi.
Izoh (0)