O‘zbekistonda 2023-yilda 75 ming nafar nogironligi bo‘lgan shaxslar pensiyasiga o‘rtacha 300 ming so‘m qo‘shiladi
5-oktabr kuni Oliy Majlis Senatining Xotin-qizlar va gender tenglik qo‘mitasida “Fuqarolarning davlat pensiya ta’minoti to‘g‘risidagi O‘zbekiston Respublikasining qonuniga pensiya tayinlash tartibini takomillashtirishga qaratilgan o‘zgartish va qo‘shimchalar kiritish haqida”gi qonuni muhokama qilindi. Bu haqda yuqori palata axborot xizmati xabar qildi.
Qayd etilishicha, mazkur qonunning asosiy maqsadi ijtimoiy adolat tamoyilidan kelib chiqib, nogironligi bo‘lgan shaxslarning daromadini oshirish hamda mehnatini munosib qadrlash, fuqarolarning pensiya ta’minoti bo‘yicha qonun hujjatlarini amaliyotda qo‘llashda yuzaga kelayotgan turli xil yondashuvlarning oldini olishdan iborat.
2023-yil 1-yanvardan boshlab I va II guruh nogironligi bo‘lgan shaxslarning pensiya tayinlanganidan keyingi kamida 1 yillik ish staji va ish haqi miqdoridan kelib chiqib, har 2 yilda bir marotaba tayinlangan pensiya qayta hisoblanadi hamda pensiya miqdoriga qo‘shib boriladi.
Qonun qabul qilinsa, 2023-yilda (1994–2022-yillarda ish stajiga ega bo‘lgan) 75 ming nafar nogironligi bo‘lgan shaxslarning pensiyalariga o‘rtacha 300 ming so‘m qo‘shiladi hamda kelgusida mehnat faoliyatini olib borganlarning (bugungi kunda 43 ming nafari rasman band) pensiyasi har 2 yilda (ish staji va oylik ish haqidan kelib chiqib) bir marotaba qayta hisoblab boriladi.
Qonun bilan o‘gay ota-ona, vafot etgan o‘gay farzandini tarbiyalagan davrini aniqlash tartibi hamda O‘zbekiston oldida alohida xizmatlari bo‘lgan shaxslarning pensiyalariga ustamalarni to‘lash tartibi hukumat tomonidan belgilanishi ko‘zda tutilmoqda.
Ta’kidlanishicha, ushbu qonunning qabul qilinishi amaliyotda qo‘llashda yuzaga kelayotgan turli xil yondashuvlar oldini olish, korrupsiogen faktorlarni keltirib chiqaruvchi holatlarga barham berish, ijtimoiy adolat tamoyilidan kelib chiqib, nogironligi bo‘lgan shaxslarning daromadini oshirishga xizmat qiladi.
Majlis so‘nggida qo‘mitaning tegishli qarorlar qabul qilindi.
