O‘zbekiston va Misr paxtachilik sohasida hamkorlik qilmoqchi

Qohira shahrida 6-oktabr kuni O‘zbekiston innovatsion rivojlanish vaziri Ibrohim Abdurahmonovning Misr Paxta arbitraji va sinovi bosh tashkiloti (CATGO) raisi Muhammad Xalil Xedr bilan uchrashuvi o‘tkazildi, deb xabar bermoqda “Dunyo” AA.

Ta’kidlanishicha, tomonlar ikki davlat paxtachilik sohasida hamkorlik qilish, xususan, CATGO va O‘zbekiston Vazirlar Mahkamasi qoshidagi “Sifat” paxta tolasini sertifikatlash markazi bilan yaqindan aloqalar o‘rnatish, paxta tolasini sertifikatlash va sinovdan o‘tkazish borasida texnologiya va tajriba almashish bo‘yicha onlayn muzokaralar tashkil etish, shuningdek, “Sifat” markazi vakillari va sohada faoliyat yurituvchi 5–6 nafar olim va mutaxassis uchun yil yakuniga qadar CATGO’ning o‘quv kursida grant asosida malakasini oshirish bo‘yicha kelishuvlarga erishdi.

Mamlakatning Qohira shahridagi elchixonasi ma’lumotiga ko‘ra, Misr Paxta arbitraji va sinovi bosh tashkiloti (CATGO) 1975-yilda tashkil etilgan bo‘lib, faoliyat yo‘nalishlari paxta sifatini o‘rganish, uni yanada yaxshilash va sohada ilmiy tadqiqotlar olib borishdan iborat.