O‘zbekiston va AQSH olimlari yangi paxta navini yaratdi
O‘zbekiston va AQSH olimlari vilt kasalligiga chidamli yangi paxta navini yaratdi. Bu haqda Innovatsion rivojlanish vazirligi axborot xizmati xabar berdi.
Ko‘plab mamlakatlar, jumladan, AQSH va O‘zbekistonda paxta qishloq xo‘jaligidagi muhim ekinlaridan biri, deb yozadi Amerika o‘simlikshunoslik jamiyati. So‘nggi yigirma yilda Kaliforniyadagi va O‘zbekiston dalalarida g‘o‘za vilt kasalligiga uchrashi, oqibatda o‘simlik qurib qolish holatlari ko‘p kuzatilmoqda.
Bu muammoni hal qilish, g‘o‘za yetishtirayotgan fermerlarga ko‘mak berish maqsadida AQSH va o‘zbekistonlik olimlar birgalikda tadqiqot ishlarini olib bormoqda. Bu ikki mamlakatda ham paxta hosili nobud bo‘lishining oldini olmoqda. Bunda g‘o‘zaning zamburug‘ga chidamliligini oshirishga qaratilgan yechimni topish ustida tadqiqotlar olib borildi.
“O‘zbekistonlik olimlar va AQSH tadqiqotchilari kasallikka chidamli navlarni aniqlab, ularni chatishtirish orqali viltga chidamli paxta navini yaratishga erishdi. Bizning harakatlarimiz zoye ketmadi, deya quvonch bilan ayta olaman”, – deydi AQSH Qishloq xo‘jaligi vazirligining genetik-tadqiqotchisi Maurisio Ulloa.
Mazkur tadqiqotlarda O‘zbekiston FA Genomika va bioinformatika markazi olimlari ishtirok etmoqda va bu tadqiqotlar Amerika o‘simlikshunoslik jamiyatining Journal of Plant Registrations ilmiy nashrida chop etilgan. Tadqiqotchilar O‘zbekistonda va AQSHda yetishtiriladigan zamburug‘larga chidamli navlarni chatishtirish orqali paxtaning yangi liniyalar germplazmasini yaratdi. Germplazma yana genetik resurs ham deb ataladi va u seleksionerlarga qishloq xo‘jalik ekinlari navlarini kengaytirishga yordam beradi.
