OPEK+ davlatlari kunlik neft qazib olish hajmini 2 million barrelga qisqartiradi. Buning oqibatlari haqida tahlil
OPEK+ a’zo davlatlari neft qazib olishni noyabr oyidan kuniga 2 million barrelga qisqartirishga kelishib oldi. Bu 2020-yildan beri eng katta pasayishdir. Bu haqda “Daryo”ga tashkilot bayonotidan ma’lum bo‘ldi.
Eron neft vaziri o‘rinbosari Amir Husayn Zaminiya matbuot anjumanida OPEKning navbatdagi yig‘ilishi dekabr oyida bo‘lib o‘tishini aytdi.
Rossiya bosh vaziri o‘rinbosari Aleksandr Novakning so‘zlariga ko‘ra, qisqartirish OPEK uchun talabning mavsumiy pasayishi oldidan bozorni muvozanatlashi uchun zarur.
Bloomberg ma’lumotlariga ko‘ra, qisqartirish global ta’minotga unchalik ta’sir qilmaydi, chunki OPEKning bir nechta a’zolari allaqachon belgilangan kvotalar miqdoridan ancha past quvvatda xomashyo ishlab chiqarmoqda.
Agentlik OPEK mamlakatlarining ishlab chiqarish bo‘yicha hisobotiga asoslanib, neft qazib olishni umumiy qisqartirish uchun sakkizta davlat uni buni amalga oshirishi kerak, deb hisoblaydi.
Bu tashkilot tomonidan ishlab chiqarishning birinchi qisqarishi emas: 5-sentyabr kuni OPEK+ yig‘ilishida oktabr oyida neft qazib olish hajmini kuniga 100 ming barrelga kamaytirishga qaror qilingan.
Financial Times’ning yozishicha, Rossiya va Saudiya Arabistoni yonilg‘i ishlab chiqarishni qisqartirishni talab qilgan. Bunga AQSH qarshi chiqqan. Mamlakat hukumatining fikricha, bu neft narxining global o‘sishiga olib keladi.
FT ekspertlariga ko‘ra, OPEKning ishlab chiqarishni qisqartirish qaroriga javoban, AQSH neft zaxiralarini strategik zaxiralardan chiqarishi mumkin.
Bugun, 5 oktabr kuni Yevropa Ittifoqi Rossiyaga qarshi sanksiyalarning sakkizinchi paketi doirasida neftni dengiz orqali uchinchi davlatlarga belgilanganidan yuqori narxda tashishni taqiqladi.
Yevropa Ittifoqining Rossiya neftiga nisbatan embargosi 5-dekabrdan kuchga kiradi.
