OPEK+ neft qazib olish hajmini 1 million barrelga qisqartirmoqchi

5-oktabr kuni Venada bo‘lib o‘tadigan yig‘ilishda Neft eksport qiluvchi davlatlar (OPEK) va unga a’zo bo‘lmagan davlatlar tashkiloti (OPEK+) ishlab chiqarishni kuniga 1 million barreldan ko‘proq qisqartirish masalasini ko‘rib chiqadi. Bu haqda Bloomberg xabar bermoqda.

JPMorgan Chase fikricha, OPEK+ narxlarni barqarorlashtirish uchun ishlab chiqarishni kuniga kamida 500 ming barrelga qisqartirishi kerak bo‘lishi mumkin.

Bloombergning qayd etishicha, mumkin bo‘lgan qisqarish pul-kredit siyosatining keskinlashuvi sharoitida jahon iqtisodiyotining tez sur’atlar bilan sekinlashishi fonida yuz beradi.

Delegatlar Venada bo‘lib o‘tadigan yig‘ilishdan oldin qisqartirish hajmi bo‘yicha yakuniy qaror qabul qilinmasligini aytdi.

Reuters avvalroq OPEK+ neft bozorini qo‘llab-quvvatlash uchun noyabr oyida neft qazib olishni kuniga 0,5-1 million barrelga qisqartirish imkoniyatini muhokama qilayotgani haqida xabar bergan edi.

5-oktabrdagi yig‘ilish OPEK+ning 2020-yil martidan beri birinchi yuzma-yuz uchrashuvi bo‘ladi, o‘shanda tadbir koronavirus pandemiyasi tufayli masofaviy formatga o‘tkazilgan.

Avvalroq dunyoda neft narxi pasayishda davom etayotgani haqida xabar berilgandi.