“Hokim o‘zboshimchalik qilgan”. Andijonda maktab stadioni tadbirkorga sotib yuborilgani aytilmoqda

Andijon viloyatining Paxtaobod tumanidagi 13-umumta’lim maktabining futbol o‘yingohi va unga yondosh hudud 2020-yil tuman hokimligi tomonidan zaxiraga olinib, o‘sha yilning o‘zida auksion orqali tadbirkorga sotilgan. Oradan ikki yil o‘tib, boshqa bir tadbirkor tomonidan stadionda qurilish ishlari boshlab yuborilgan. Bundan maktab o‘qituvchilari va o‘quvchilarning ota-onalari norozi bo‘lmoqda. “Daryo” muxbiri murojaatchilar hamda mutasaddilar bilan suhbatlashdi.

Fuqaro Nurillo To‘xtasinovning ma’lum qilishicha, prezidentning 2018-yil 5-sentabrdagi “Xalq ta’limi tizimiga boshqaruvning yangi tamoyillarini joriy etish chora-tadbirlari to‘g‘risida” qarorida umumta’lim va maktabdan tashqari muassasalarning yer uchastkalari va ko‘chmas mulkini Xalq ta’limi vaziri bilan kelishmasdan begonalashtirish taqiqlab o‘tilganligiga qaramasdan maktab balansidagi o‘quvchilar, mahalla yoshlari foydalanib kelayotgan zaxiraga olinmagan yer maydoni Paxtaobod tumani hokimligi tomonidan noqonuniy ravishda auksionga qo‘yib sotib yuborilgan.

Auksionda sotilgan maktab stadionini Tolibjon Mirzayev yutib olgan. Uning vakili Javlon Abduqahhorov maktab jamoasi va mahalla ahlining keskin noroziligiga qaramasdan stadionni buzishga urinmoqda. Mahalla faollari, o‘qituvchilarning tushuntirishiga qaramasdan hech kimni pisand qilmayapti. Aksincha, 2022-yilning 16-iyul kuni Javlon Abduqahhorov boshchiligidagi ustalar ekskavator yordamida stadionni buzish ishlarini boshlamoqchi bo‘lgan. Natijada 100 ga yaqin mahalla ahli unga yer noqonuniy ravishda egallanganligini aytib, buzish ishlarini to‘xtatishni talab qilgan. Tortishuv yuzasidan tuman hokimligiga murojaat yo‘llangan. Shundan so‘ng holatni o‘rganish uchun tumanning sobiq hokimi Elyorbek Usmonov va mutasaddi tashkilot vakillari yetib kelgan. O‘rganish davomida tadbirkorga masala chuqur o‘rganilmagunicha o‘zboshimchalik bilan buzish ishlarini to‘xtatib turish vazifasi yuklatilgan, — deydi Nurillo To‘xtasinov.

Nurillo To‘xtasinovning ma’lum qilishicha, maktab jamoasi hamda ota-onalar ushbu holatni qonuniy o‘rganib berishlarini so‘rab tuman hokimligiga, adliya bo‘limiga, viloyat prokuraturasi va viloyat xalq ta’limi boshqarmasi, hamda Xalq ta’limi vaziriga bir necha marotaba murojaat qilgan. Ammo ijobiy yechim yo‘q.

Maktab direktori Saidaxon Ergasheva 2022-yilning 20-iyul kuni Xalq ta’limi vaziri Baxtiyor Saidovning navbatdagi fuqarolar qabulida ishtirok etib, ayni shu masalada murojaat qilgan. Muloqot chog‘ida vazir zudlik bilan Andijon viloyati xalq ta’limi boshqarmasi, Paxtaobod tumani xalq ta’lim bo‘limi rahbariyati hamda vazirlik huquqiy nazorat xizmati mas’ullariga ushbu holatni nazoratga olish va maktab yerini hech kim o‘zboshimchalik bilan egallashiga yo‘l qo‘ymaslik bo‘yicha zarur topshiriqlar berdi. Biroq oradan shuncha vaqt o‘tgan bo‘lsa-da hech qanday choralar ko‘rilmayapti. Aksincha, tadbirkorning ishonchli vakili tushuntirishlarimizga qaramasdan o‘zboshimchalik bilan stadionni buzishda davom etmoqda, — deydi murojaatchi.

Paxtaobod tumani hokimligi tomonidan xalq ta’limi bo‘limiga qarashli 13-umumta’lim maktabi tasarrufidagi 0,46 gektar yer maydonini tuman zaxira fondiga qaytarish haqida 2020-yil 27-iyun kuni qaror qabul qilingan. Bunda hokimlik maktab direktorining 2020-yil 16-iyundagi hamda 23-iyuldagi, shuningdek xalq ta’limi bo‘limining 23-iyuldagi aloqa xatlarini asos qilib olgan. Vaholanki, bo‘lim va maktab direktorining maktab yerlarini tuman hokimligi zaxira fondiga qaytarishga e’tirozi yo‘qligi haqida aloqa xati berishga vakolati yo‘q edi.

Maktablarning yer maydonlari prezident qarori bilan Xalq ta’limi vazirligi tasarrufida ekanligi, vazir bilan kelishmasdan begonalashtirish taqiqlanishini aniq qilib belgilab qo‘yilgan. Biroq, tuman hokimi vazirning ruxsatisiz qaror qabul qilgan. Hozirda asossiz olib qo‘yilgan yer maydonlariga qo‘shimcha ravishda oshxona, mini stadion hamda boshlang‘ich sinf o‘quvchilari uchun qo‘shimcha sinf xonalari qurish zaruriyati tug‘ilgan. Shu sababli xalq ta’limi bo‘limi tomonidan sudga tuman hokimining qarorini haqiqiy emas deb topishga qaror chiqarib berishini so‘rab da’vo arizasi kiritilgan, — deydi Umarxo‘ja Madaminov.

Prezidentimizning 2020-yil 21—22-may kunlari Andijon viloyatiga tashrifi davomida berilgan topshiriqlar va kengaytirilgan tarzda o‘tkazilgan 34-sonli majlis bayonining 82-bandiga muvofiq viloyat hokimining 2020-yil 26-iyundagi farmoyishi bilan alohida ishchi guruhi tuzilgan. Shunga muvofiq 2020-yil 1-iyul kuni tuman hokimining investitsiya masalalari bo‘yicha o‘rinbosari boshchiligida tuman investitsiyalar va tashqi savdo bo‘limi, moliya, arxitektura va qurilish, yer tuzish va ko‘chmas mulk kadastri, xalq ta’limi bo‘limlari hamda 13-maktab direktori ishtirokida dalolatnoma tuzilgan. Unda maktab hududida maktab ehtiyojidan ortiqcha 0,73 ga yer maydoni bo‘sh turganligi qayd etilgan.

Shuningdek, maktab direktori S.Ergasheva tuman hokimligiga 2020-yil 16-iyun hamda 23-iyul kuni 13-maktab ehtiyojidan ortiqcha yer maydonlarini tuman hokimligi zaxirasiga olinishida amaliy yordam so‘rab aloqa xati orqali murojaat qilgan. Ushbu murojaatlarga asosan tuman hokimining 2020-yil 27-iyundagi qarori bilan 0,46 gektar yer uchastkasi hamda 2020-yil 24-iyuldagi qarori bilan 0,27 gektar yer uchastkalari hokimlik zaxirasiga olingan. Va auksion savdolariga chiqarilgan.

Yuqoridagilardan kelib chiqib, Paxtaobod tumani hokimining 2020-yil 30-iyundagi, 27-iyundagi hamda 24-iyuldagi qarorlarini bekor qilish yuzasidan tuman xalq ta’limi bo‘limi tomonidan yerni xalq ta’limi balansiga qaytarish yuzasidan sudga da’vo arizasi berilgan. Mazkur holat ayni paytda sud tartibida ko‘rib chiqilmoqda, — deydi Abdulloh Usmonov.