«Ҳоким ўзбошимчалик қилган». Андижонда мактаб стадиони тадбиркорга сотиб юборилгани айтилмоқда

Андижон вилоятининг Пахтаобод туманидаги 13-умумтаълим мактабининг футбол ўйингоҳи ва унга ёндош ҳудуд 2020 йил туман ҳокимлиги томонидан захирага олиниб, ўша йилнинг ўзида аукцион орқали тадбиркорга сотилган. Орадан икки йил ўтиб, бошқа бир тадбиркор томонидан стадионда қурилиш ишлари бошлаб юборилган. Бундан мактаб ўқитувчилари ва ўқувчиларнинг ота-оналари норози бўлмоқда. «Дарё» мухбири мурожаатчилар ҳамда мутасаддилар билан суҳбатлашди.

Фуқаро Нурилло Тўхтасиновнинг маълум қилишича, президентнинг 2018 йил 5 сентябрдаги «Халқ таълими тизимига бошқарувнинг янги тамойилларини жорий этиш чора-тадбирлари тўғрисида» қарорида умумтаълим ва мактабдан ташқари муассасаларнинг ер участкалари ва кўчмас мулкини Халқ таълими вазири билан келишмасдан бегоналаштириш тақиқлаб ўтилганлигига қарамасдан мактаб балансидаги ўқувчилар, маҳалла ёшлари фойдаланиб келаётган захирага олинмаган ер майдони Пахтаобод тумани ҳокимлиги томонидан ноқонуний равишда аукционга қўйиб сотиб юборилган.

Аукционда сотилган мактаб стадионини Толибжон Мирзаев ютиб олган. Унинг вакили Жавлон Абдуқаҳҳоров мактаб жамоаси ва маҳалла аҳлининг кескин норозилигига қарамасдан стадионни бузишга уринмоқда. Маҳалла фаоллари, ўқитувчиларнинг тушунтиришига қарамасдан ҳеч кимни писанд қилмаяпти. Аксинча, 2022 йилнинг 16 июль куни Жавлон Абдуқаҳҳоров бошчилигидаги усталар экскаватор ёрдамида стадионни бузиш ишларини бошламоқчи бўлган. Натижада 100 га яқин маҳалла аҳли унга ер ноқонуний равишда эгалланганлигини айтиб, бузиш ишларини тўхтатишни талаб қилган. Тортишув юзасидан туман ҳокимлигига мурожаат йўлланган. Шундан сўнг ҳолатни ўрганиш учун туманнинг собиқ ҳокими Элёрбек Усмонов ва мутасадди ташкилот вакиллари етиб келган. Ўрганиш давомида тадбиркорга масала чуқур ўрганилмагунича ўзбошимчалик билан бузиш ишларини тўхтатиб туриш вазифаси юклатилган, — дейди Нурилло Тўхтасинов.

Нурилло Тўхтасиновнинг маълум қилишича, мактаб жамоаси ҳамда ота-оналар ушбу ҳолатни қонуний ўрганиб беришларини сўраб туман ҳокимлигига, адлия бўлимига, вилоят прокуратураси ва вилоят халқ таълими бошқармаси, ҳамда Халқ таълими вазирига бир неча маротаба мурожаат қилган. Аммо ижобий ечим йўқ.

Мактаб директори Саидахон Эргашева 2022 йилнинг 20 июль куни Халқ таълими вазири Бахтиёр Саидовнинг навбатдаги фуқаролар қабулида иштирок этиб, айни шу масалада мурожаат қилган. Мулоқот чоғида вазир зудлик билан Андижон вилояти халқ таълими бошқармаси, Пахтаобод тумани халқ таълим бўлими раҳбарияти ҳамда вазирлик ҳуқуқий назорат хизмати масъулларига ушбу ҳолатни назоратга олиш ва мактаб ерини ҳеч ким ўзбошимчалик билан эгаллашига йўл қўймаслик бўйича зарур топшириқлар берди. Бироқ орадан шунча вақт ўтган бўлса-да ҳеч қандай чоралар кўрилмаяпти. Аксинча, тадбиркорнинг ишончли вакили тушунтиришларимизга қарамасдан ўзбошимчалик билан стадионни бузишда давом этмоқда, — дейди мурожаатчи.

Пахтаобод тумани ҳокимлиги томонидан халқ таълими бўлимига қарашли 13-умумтаълим мактаби тасарруфидаги 0,46 гектар ер майдонини туман захира фондига қайтариш ҳақида 2020 йил 27 июнь куни қарор қабул қилинган. Бунда ҳокимлик мактаб директорининг 2020 йил 16 июндаги ҳамда 23 июлдаги, шунингдек халқ таълими бўлимининг 23 июлдаги алоқа хатларини асос қилиб олган. Ваҳоланки, бўлим ва мактаб директорининг мактаб ерларини туман ҳокимлиги захира фондига қайтаришга эътирози йўқлиги ҳақида алоқа хати беришга ваколати йўқ эди.

Мактабларнинг ер майдонлари президент қарори билан Халқ таълими вазирлиги тасарруфида эканлиги, вазир билан келишмасдан бегоналаштириш тақиқланишини аниқ қилиб белгилаб қўйилган. Бироқ, туман ҳокими вазирнинг рухсатисиз қарор қабул қилган. Ҳозирда асоссиз олиб қўйилган ер майдонларига қўшимча равишда ошхона, мини стадион ҳамда бошланғич синф ўқувчилари учун қўшимча синф хоналари қуриш зарурияти туғилган. Шу сабабли халқ таълими бўлими томонидан судга туман ҳокимининг қарорини ҳақиқий эмас деб топишга қарор чиқариб беришини сўраб даъво аризаси киритилган, — дейди Умархўжа Мадаминов.

Президентимизнинг 2020 йил 21—22 май кунлари Андижон вилоятига ташрифи давомида берилган топшириқлар ва кенгайтирилган тарзда ўтказилган 34-сонли мажлис баёнининг 82-бандига мувофиқ вилоят ҳокимининг 2020 йил 26 июндаги фармойиши билан алоҳида ишчи гуруҳи тузилган. Шунга мувофиқ 2020 йил 1 июль куни туман ҳокимининг инвестиция масалалари бўйича ўринбосари бошчилигида туман инвестициялар ва ташқи савдо бўлими, молия, архитектура ва қурилиш, ер тузиш ва кўчмас мулк кадастри, халқ таълими бўлимлари ҳамда 13-мактаб директори иштирокида далолатнома тузилган. Унда мактаб ҳудудида мактаб эҳтиёжидан ортиқча 0,73 га ер майдони бўш турганлиги қайд этилган.

Шунингдек, мактаб директори С.Эргашева туман ҳокимлигига 2020 йил 16 июнь ҳамда 23 июль куни 13-мактаб эҳтиёжидан ортиқча ер майдонларини туман ҳокимлиги захирасига олинишида амалий ёрдам сўраб алоқа хати орқали мурожаат қилган. Ушбу мурожаатларга асосан туман ҳокимининг 2020 йил 27 июндаги қарори билан 0,46 гектар ер участкаси ҳамда 2020 йил 24 июлдаги қарори билан 0,27 гектар ер участкалари ҳокимлик захирасига олинган. Ва аукцион савдоларига чиқарилган.

Юқоридагилардан келиб чиқиб, Пахтаобод тумани ҳокимининг 2020 йил 30 июндаги, 27 июндаги ҳамда 24 июлдаги қарорларини бекор қилиш юзасидан туман халқ таълими бўлими томонидан ерни халқ таълими балансига қайтариш юзасидан судга даъво аризаси берилган. Мазкур ҳолат айни пайтда суд тартибида кўриб чиқилмоқда, — дейди Абдуллоҳ Усмонов.